İspaniya məhkəməsi “Neymar işi”ni bağlayıb. Bununla da PSJ-nin hücumçusunun cəzalanmaq təhlükəsi aradan qalxıb.

Football-plus.az xəbər verir ki, Kataloniya Ali Məhkəməsinin yaydığı məlumatda 2013-cü ildə “Santos”dan “Barselona”ya transferi ətrafında yaranan mübahisəli vəziyyətdə braziliyalı futbolçuya bəraət verildiyi bildirilib. Bu iş üzrə dinləmə prosesi oktyabrda İspaniyada keçirilmişdi. Neymardan başqa “Barselona”nın sabiq prezidenti Sandro Rosell və futbolçunun valideynləri də istintaqa cəlb olunmuşdu. Ali Məhkəmə onlara da bəraət verib.

Xatırladaq ki, yerli prokurorluq əvvəlcə Neymar üçün ikiillik həbs cəzası istəmişdi. Buna səbəb kimi “Barselona”ya keçidinə görə ona çatan ödənişlərin bir hissəsini gizli saxlaması ilə bağlı şübhəli məqamlar göstərilmişdi.