“Çox maraqlı görüş oldu. Tribunaların bir tərəfində “Cəbrayıl”, bir tərəfində də bizim azarkeşlərimiz yer almışdı. Ümumilikdə stadionda yaxşı atmosfer var idi. Hər iki komanda gözəl oyun nümayiş etdirdi. Həmişəki kimi oyunu cinahlardan qururuq. Bu dəfə də İlyas Səfərov sol cinahdan topu ötürdü və Emin Quliyev 37-ci dəqiqədə hesabı açdı. İlk hissə üstünlüyümüz şəraitində keçdi. Doğrusu, bu qarşılaşmaya itkilərlə çıxmışdıq. Əsas qol silahımız Elvin Nəsibov yox idi, yarımmüdafiə ilə müdafiədə problemlərimiz var idi. İkinci hissə başlayan kimi də irəli atıldıq. Epizodun təkrarına baxdıqda görəcəksiz, Elçin Rəhimli qapıçıyla təkbətək çıxır, rəqibin futbolçusu isə aşkar şəkildə əlini açaraq onu saxlayır. Baş hakim burda yüzfaizlik penaltimizi vermədi. “Kürmük Qax”la oyunumuzda VAR sistemi tətbiq etmişdilər. Lakin belə önəmli matçda VAR sistemi olmadı. İndi ola bilsin ki, hakimin gözündən yayınıb, görməyib. Ancaq VAR sistemi olsaydı, 100 faiz penalti qazanacaqdıq. Hesabın 1:1 olduğu vaxtda oyunun qırılma nöqtəsi həmin penalti ola bilərdi. Rəqibin qapıçısı bu oyunda 3-4 önəmli qol epizodunda komandasını xilas etdi. 70-75 dəqiqədən sonra komandamda yorğunluq hiss olundu. Bunun da səbəbi məşq prosesində bir sıra çatışmazlıqların olmasındadı. Ancaq yenə də futbolçularıma təşəkkür edirəm. Son dəqiqəyə kimi vuruşdular. Rəqibi də təbrik edirəm, play-offda uğurlar arzulayıram. Son dəqiqələrə kimi qələbəyə can atdıq. Çünki heç-heçəylə razı deyildik”.

“Komandaya sahib çıxan var. Sona bir tur qalmış yeni prezidentimiz gəldi. Oyundan sonra da bizi komanda şəklində restorana apardılar. Göstərdiyimiz oyuna görə də təşəkkürlərini bildirdilər, üzülməməyimizi istədilər. Sağ olsunlar, bizi anlayışla qarşıladılar. Futboldu, qismət beləymiş. Növbəti mövsüm üçün artıq hədəfimiz çempionluq olacaq”.