“Sabah” Misli premyer-liqasının 35-ci turunu 55 xalla turnir cədvəlinin 4-cü pilləsində tamamladı.

Masazır təmsilçisi “Zirə” ilə eyni xala sahib olsa da, şəxsi oyunların nəticəsinə görə 3-cü sıradan məhrumdu. Hətta bu statistika “tələbələr”i mövsümün ikincisi etməkdən də məhrum edə bilər. Bu azmış kimi, “Sabah”ı “futbol ili”nin son matçında çətin sınaq gözləyir. Renduliçin komandası mayın 25-i, saat 19.00-da “Neftçi”nin qonağı olacaq. Elə bir matçdan bəhs edirik ki, 90 dəqiqənin sonunda tərəflərdən biri avrokuboklara yollanacağını rəsmiləşdirəcəksə, digəri ilk “dördlük”dən kənarda qala bilər! Xüsusən də “Sabah” bu gün ciddi təzyiq altındadı. Bəs “tələbələr” özünü necə hiss edir? Qarşıdakı taleyüklü görüşə hazırlıq nə yerdədi? Bu və başqa suallar ətrafında masazırlıların kapitanı Elvin Camalovla söhbət etdik.

– 35-ci turda “Sumqayıt”la gərgin mübarizədən qalib ayrıldız. Riyazi cəhətdən bu, əsas işin yarısının görülməsi deməkdi. Oyun haqda fikirlərin necədi?
– Bəli, bizim üçün çox vacib oyun idi. Hamı matçın məsuliyyətini yaxşı dərk edirdi. Məncə, komanda olaraq, yaxşı mübarizə apardıq. Əsas məsələ istəkli çıxış etmək idi ki, bunu da bacardıq. Çox şükür, məqsədimizə çatmaq üzrəyik.

– Qarşıdan çətin “Neftçi” – “Sabah” görüşü gəlir. Düşərgədə əhval-ruhiyyə necədi?
– Matç final dəyərindədi. Hər iki komanda yalnız qələbə üçün meydana çıxacaq. İşlərimiz qaydasındadı. Şükür Allaha, hansısa problem yoxdu. Ümid edirəm ki, meydandan bizə lazım olan nəticəylə ayrıla biləcəyik. Buna nəyinsə mane olmasına imkan verməməliyik. Hər kəs bütün fikrini məhz bu oyuna yönəldib. Əlimizdən gələni edirik ki, qarşılaşmaya ən yüksək səviyyədə hazır olaq.

– “Sumqayıt”la matçda tribunalarda 2300 azarkeş əyləşmişdi. Səncə, səfərdə də bu qədər tərəfdar sizi dəstəkləməyə gələcək?
– Fürsətdən istifadə edib son oyunda komandamıza dəstək verən azarkeşlərimizə təşəkkür edirəm. Onların varlığı bizdə əvəzolunmaz hisslər yaradır. Düzdü, ev və səfər görüşləri arasında azarkeş sayına görə fərq olur. Lakin tərəfdarların qarşıdakı oyunda da bizi tək qoymayacağına inanıram. Məncə, bu yöndə problem olmayacaq. Biz də qələbə qazanaraq azarkeşlərimizi sevindirəcəyik.

– Mövsümü ilk “dördlük”də bitirməmək təhlükəsiylə üz-üzəsiz. Qorxduğunuz başa gəlsə, bunda 34-cü turda “Qəbələ”yə məğlubiyyətin rolu nə dərəcədə olacaq?
– Gəlin, mövsümü bir oyunla əlaqələndirməyək. Məncə, bu, düzgün yanaşma deyil. 35 tur ərzində xal itirdiyimiz başqa oyunlar da olub. Bütün komandaların başına gələ biləcək hadisədi. Heç kimə sirr deyil ki, premyer-liqada rəqabət artıb. Bu gün hər kollektiv digərini məğlub etmək əzmindədi. Dəfələrlə belə halların şahidi olmuşuq.

– Son 6 turda bir dəfə məğlub olmusuzsa, beş qələbə qazanmısız. Komandanın toparlanmasını Murad Musayevlə əlaqələndirənlər də var, Krunoslav Renduliçlə də. Sənin fikrin necədi? Hansı ciddi dəyişiklik yüksəlişə səbəb oldu?
– Baş məşqçiləri müqayisə etmək istəməzdim. Hər mütəxəssisin öz oyun üslubu, dəst-xətti var. Öz adıma danışası olsam, mənə həm Musayevlə, həm də Renduliçlə çalışmaq xoşdu. Sadəcə, mövsüm sona yaxınlaşdıqca mübarizə daha da gərginləşir. Şanslar azaldığından hər oyunu sonuncu fürsət kimi dəyərləndirirsən.

– Əlbəttə, mövqeyinə görə qol vurmaq öhdəliyin yoxdu. Cari mövsümdə meydana çıxdığın 25 matçda cəmi bir məhsuldar ötürməylə yadda qalmısan. Bunu nə ilə izah edirsən?
– Hər futbolçunun vəzifəsi komandasına maksimum kömək etməkdi. Bunu ya qol vurmaqla, məhsuldar ötürmə verməklə, ya da arxa xətdə etibarlı çıxışla edə bilərsən. Mən də öz növbəmdə əlimdən gələni etməyə çalışıram. Bilindiyi kimi, mövqeyimlə bağlı meydandakı tapşırığım fərqlidi. Qol vurmaq isə oyunun gedişində ələ düşən fürsətlə bağlı məsələdi. Əsas komandama faydalı olmaqdı. Bunun hansı şəkildə olmasının ciddi əhəmiyyəti yoxdu.

– Yeri gəlmişkən, cari mövsümün sonunda müqavilənin müddəti başa çatır. Klubla danışıqlara başlamısanmı? Başqa komandalardan təkliflər varmı? Ümumiyyətlə, yola “Sabah”la davam etmək istəyirsənmi?
– Düzü, hazırda qarşıdakı oyuna köklənmişəm. İndi yalnız bu barədə düşünürəm. Onu deyə bilərəm ki, “Sabah”da özümü xoşbəxt hiss edirəm. Burda olduğuma görə şadam.

KƏNAN BAHADIR