Kroos şayiələrə birdəfəlik son qoydu
Toni Kroos haqda şayiələrə birdəfəlik son qoyulub. O, karyerası ilə bağlı vacib qərar verib.
Bir müddət əvvəl Səudiyyə Ərəbistanından aldığı cəlbedici təklifləri geri çevirən futbolçunun klubu ilə yenidən anlaşmasıyla bağlı xəbər doğru çıxmayıb. “Real” rəhbərliyinin yarımmüdafiəçi ilə müqavilənin müddətini 2025-ci ilin yayına qədər uzatdığı iddia edilmişdi. Bu barədə bir neçə gün əvvəl tanınmış jurnalist Nikolo Skira özünün sosial şəbəkə hesabında məlumat vermişdi. Lakin almaniyalı futbolçu tezliklə yaşıl meydanı birdəfəlik tərk etmək qərarına gəlib. Toni 34 yaşında peşəkar karyerasına son qoymağı lazım bilib. O, “X” sosial şəbəkə hesabında bu cümlələri yazıb:
“17 iyul 2014-cü il mənim “Real”ın yeni oyunçusu kimi təqdim olunduğum tarixdi. Bu tarix mənim həyatımı yalnız futbolçu yox, həm də bir insan kimi dəyişən gündü. Prezident Florentino Peresə, kluba, həmçinin burda məni açıq qəlblə qəbul edən və mənə inanan hər kəsə təşəkkür edirəm. Hər şeydən əvvəl sizə - “madridista”ya minnətdarlığımı bildirmək istəyirəm. Klubdakı ilk günümdən mənə çəkdiyiniz sığala və vediyiniz dəstəyə görə təşəkkür edirəm. Karyeram Avropa çempionatından sonra başa çatacaq. Bir müddət əvvəl dediyim kimi, “Real” mənim sonuncu klubum olacaq”.
Kroos Madrid klubunda 2014-cü ildən çıxış edir. O, bu müddət ərzində bütün yarışlarda 463 matçda iştirak edib, 28 qol vurub və 98 məhsuldar ötürmə verib. Yarımmüdafiəçinin cari mövsümdəki göstəriciləri isə uyğun olaraq 46-ya, 1-ə və 9-a bərabərdi. Madridə gəlməzdən əvvəl 2007-14-cü illərdə “Bavariya”ya məxsus olan Toni bir mövsüm (209/10) icarə qaydası ilə “Bayer-04”də oynayıb. “Bavariya”da 205 matçda iştirak edib, 24 qol vurub və 49 məhsuldar ötürmə verib. “Real”la 4 dəfə İspaniya çempionatında, 4 dəfə Çempionlar Liqasında (ÇL), 1 dəfə İspaniya kubokunda, 3 dəfə İspaniya Superkubokunda, 3 dəfə UEFA Superkubokunda, 5 dəfə isə Klublararası Dünya Çempionatında qalib gəlib. Toninin “Bavariya” karyerası da titullarla zəngindi. Bu klubla 3 dəfə bundesliqada, 1 dəfə ÇL-də, 3 dəfə isə Almaniya kubokunda qalib gəlib.
Onun bir neçə ay əvvəl milli komandadakı çıxışını bərpa etmək qərarına gəldiyini də xatırladaq. Məqsədi iyunun14-dən iyulun 14-dək ölkəsində keçiriləcək Avropa çempionatında iştirak etməkdi.
