“Ölüm-dirim oyunu olacaq. Qələbə qazansaq, şansımız var ki, 1-ci liqaya vəsiqə uğrunda pley-off mübarizəsi aparaq. Bütün gücümüzü ortaya qoyacayıq. Hazırda “ASK Arena”da məşqlərimizi davam etdiririk. Bircə mənfi nüans Elvin Nəsibovun zədələnməsidi ki, ötən turda 7 qola imza atandan sonra “gözə gəldi”. Çox güman, qarşılaşmanı onsuz keçirəcəyik. Yeganə çətinliyimiz bundan ibarətdi. Qalan hər şey qaydasındadı. Elvin qədər də olmasa, onun yerini dolduracaq uşaqlar var. Düşünürəm ki, Elvinin yoxluğunu hiss etdirməyəcəyik. Meydana çıxıb vuruşacağıq. Bu elə matçdı ki, hər iki komandaya qələbə lazımdı. Ona görə də hər iki tərəf bütün gücüylə mübarizə aparacaq. Kimin qismətində nə varsa, o da olacaq. Allahın izni ilə yaxşı olar. Meydana yalnız qələbə üçün çıxacayıq. Futboldu, hər şey ola bilər. Bu üzdən də hər şeyə hazırıq. Yəni fərqli nəsə baş versə, bizim üçün faciə olmayacaq. Sadəcə, istəyirik ki, qalib gələk və 1-ci liqaya yüksəlmək şansını davam etdirək. Çünki bu qədər əziyyət çəkmişik, çox çətinliklərə sinə gərərək, bura qədər gəlib çıxmışıq. İndi şükürlər olsun ki, işlərimiz də düzəlir”.

“Həm bizim, həm də “Füzuli” üçün çox çətin oyun olacaq. Çünki bu görüşdə pley-off oynayacaq komandanın adına aydınlıq gələcək. Unutmaq lazım deyil ki, “Şahdağ Qusar” da bu oyunun nəticəsini gözləyir. Hazırda dördüncü pillədədilər. Bizim oyunumuz heç-heçə bitsə və “Şahdağ Qusar” qalib gəlsə, onda ikinci pilləni tutub, pley-off şansı əldə edəcək. Hər üç komandanın şansı var. Ümumilikdə bu mübarizə ağır olacaq. İşlərimiz davam edir, qarşılaşmaya yaxşı hazırlaşırıq. Doğrudu, itkilərimiz var. Vüsal Hüseynov 4 sarı vərəqəyə görə oyunu buraxacaq. Yüngül zədəlilərimiz də var. Amma düşünürəm ki, hələ vaxtımız var. Çalışacağıq ki, tam, komanda şəklində oyuna hazır olaq”.