Qeyd-şərtsiz bütün boks dünyası, qaydasız döyüş həvəskarları mayın 18-ni səbirsizliklə gözləyir.

“Football-plus.az” xəbər verir ki, məhz həmin gün Səudiyyə Ərəbistanının paytaxtı Ər-Riyadda möhtəşəm döyüş keçiriləcək. Oktaqona WBA, IBF və WBO versiyaları üzrə superağır çəkinin çempionu Aleksandr Usik (21-0) ilə WBC versiyası üzrə çempion Tayson Füri (34-0) çıxacaq. Bu döyüş əslində fevralın 17-də keçirilməliydi. Sadəcə, sınaq döyüşündə britaniyalının sağ gözünün üstü partladığına görə qarşılıqlı razılıq əsasındda yeni tarix müəyyənləşdi. Usik “The Stomping Ground”a qarşıdakı döyüşlə bağlı qısa müsahibə verib.

- Tayson əvvəllər səni “dovşan” adlandırırdı, indi isə hörmət etdiyini deyir. Bununla bağlı nə düşünürsən?
- Düşünürəm ki, onda bipolyarlıq var. Bir həftə deyir ki, mən dovşanam, pis oğlanam, yarımorta çəkinin boksçusuyam, bla-bla-bla, növbəti həftə isə yaxşı boksçu olduğumu deyir. Mən bu haqda düşünmürəm, yalnız döyüşə köklənmişəm.
- Döyüşlə bağlı proqnozun?
- Proqnozum yoxdu, ona görə ki, mən ekspert deyiləm. Fikrimcə, gözəl döyüş olacaq. Ukraynadan olan oğlan – Aleksandr Usik qələbə qazanacaq.

Tayson Füri də həmkarlarımızın bəzi suallarını cavablamalı olub. Ona ünvanlanan ilk sual “Usik gövdəsindən möhkəm zərbə alarsa, yıxılacaqmı” olub. Fürinin həmin suala cavabı: “Qara ciyərindən möhkəm zərbə alan istənilən adan yıxılacaq. Əsas məqam lazımi yerə zərbə vurmaqdı. Korpusundan və başından güclü zərbə alan istənilən adam yıxıla bilər”.

Füri həmçinin indiyə qədər Usik səviyyəsində boksçu ilə qarşılaşmadığını da deyib: “Usik döyüşməli olduqlarım arasında ən yaxşısıdı. O, Kliçko, Uaylder, Uayt, Çisora və qalan bütün döyüşçülərlə müqayisədə daha yaxşıdı. Usik iki çəki dərəcəsində dünya çempionu, Olimpiya Oyunlarının qalibidi. Xidmətlərinə görə heyranlıq duyuram. Usik qatil olmalı olan, ancaq ola bilməyən Entoni Coşuanın başını üzdü”.

Superağır çəkidə boks üzrə sabiq mütləq dünya çempionu Mayk Tayson da bu aləmdə ən azı Usik və Füri qədər məşhurdu. O, “FightHype”ə qarşıdakı döyüşlə bağlı açıqlama verib: “Bu döyüşü səbirsizliklə gözləyirəm. Maraqlı döyüş olacaq. Tayson Fürinin qələbəsini ehtimal edirəm. Onu dünyanın ən yaxşı döyüşçüsü sayıram, xüsusən də ağır çəkidə. Dahi döyüşçülər uduzurlar, daha döyüşçülər pis təsir bağışlayırlar, ancaq bu onların dahiliyinə mane olmur. Fürinin Nqannu ilə döyüşdə necə təsir bağışlamasında ilişib qalmamalıyıq. Tayson həmin gecəni möhtəşəm etdi, Fransisə imkan yaratdı, Füri üçün pis gün idi. Hər kəsin həyatında pis gün olur, bu da Fürinin pis günü idi”.