Bütün boks və qaydasız döyüş həvəskarları fevralın 17-ni səbirsizliklə gözləyirdi.

“Football-plus.az” xəbər verir ki, axı məhz həmin gün Səudiyyə Ərəbistanının paytaxtı Ər-Riyadda Aleksandr Usiklə Tayson Füri birləşdirici kəmər uğrunda döyüşə çıxmalıydı. Amma döyüş baş tutmayacaq. Belə ki, britaniyalı boksçu sınaq döyüşü zamanı ciddi zədə alıb, sağ gözünün üstündən qan açılıb. WBC versiyası üzrə superağır çəkinin çempionu Füri sosial şəbəkə hesabında bunları yazıb: “Tam məhv olmuşam, ona görə ki, uzun müddət idi bu döyüşə hazırlaşırdım və əla vəziyyətdəydim. Mən yalnız öz komandam, Usikin komandası, tərəfdaşlar, azarkeşlər, təşkilatçılar və Səudiyyə Ərəbistanındakı dostlar qarışıq hamıdan üzr istəyə bilərəm”.

Artıq bu döyüşün yeni tarixi də bəllidi. İki məşhur sima mayın 18-də üz-üzə gələcək. Bu xəbəri ictimaiyyətə Səudiyyə Ərəbistanı krallığının əyləncələr üzrə baş idarəsinin rəhbəri Turki Al əş-Şeyx açıqlayıb. Əş-Şeyx onu da əlavə edib ki, növbəti döyüş də baş tutmasa, səbəbkarı ciddi cəza gözləyir: “Usik döyüşdən imtina etsə, onda mən Tayson Füri ilə Entoni Coşua arasında döyüş təşkil edəcəm. Yox, Tayson yayınsa, onda Usik istədiyi döyüşçü ilə qarşılaşa biləcək. Hər iki tərəf bizə verdiyi təminatdan xəbərdardı. Mayın 18-nə nəzərdə tutulan döyüşü pozacaq tərəf 10 milyon dollar cərimə ödəyəcək”.