"Son nöqtəni qoymaqda çətinlik çəkirdik"
Misli premyer-liqasının 31-ci turunun son matçında “Araz-Naxçıvan” “Səbail”ə 0:2 hesabıyla məğlub olub.
“Football-plus.az xəbər verir ki, matçdan sonra muxtar respublika təmsilçisinin baş məşqçisi Elmar Baxşıyevin mətbuat konfransı keçirilib. Sizi mütəxəssisin fikirləri ilə tanış edirik:
“Bərabər səviyyəli oyun getdi. Çox sayda hücum təşkil etdik, sadəcə son nöqtəni qoymaqda çətinlik çəkirdik. Oyun planında komandaya etirazım yoxdu. Komanda hücum planında istədiyimi meydanda verməyə çalışırdı. Düzələsi bəzi elementlər var ki, komanda olaraq onların üzərində məşq prosesində çalışırıq. Sezonun sonuna kimi bir az motivasiyanı yüksəldib, sona qədər oynamaq vacibdi".
- Komandada qalası olsanız, heyətdə çoxlu dəyişikliklər edəcəksiz?
- Yaxşı oyunçular var. Ad çəkməyəcəyik. Hər bir komandaya əlavələr vacibdi. Daha da inkişaf etmək istəyiriksə... Bəzi mövqelər var ki, orada rəqabət yoxdu. Gələcəkdə nə olacaqsa, ona uyğun çalışacağıq.
- Neçə turdu ki, uduzursuz. Bu məqam psixoloji cəhətdən komandaya necə təsir edir?
- Çalışırıq ki, komandanın üzərində təzyiq olmasın. Bu gün məğlubiyyətimizin səbəbi psixoloji məqamlar deyil. Oyunçular meydanda çalışırlar. Ani diqqətsizlik nəticəsində qapımızda iki standar vəziyyətindən qol gördük. Bu da qaçılmazdı.
- Hakimliklə bağlı fikriniz necədi?
- Bugünkü oyundan danışırıqsa, hakim oyunun nəticəsinə təsir etmədi. Sadəcə bəzi epizodlarda mübarizəni davam etdirə bilərdi. Amma çox xırda faullarla müdaxilələr etməyə çalışırdı. Bu gün hakimlik pis deyildi.
