“Kolorado”nun hücumçusu Natan Makkinnon “Edmonton”la dünənki oyunda 2 xal topladı.

"Football-plus.az" xəbər verir ki, iki məhsuldar ötürmə verən 28 yaşlı kanadalı müntəzəm çempionatı 140 (51+89) xalla bitirdi. O, bir müntəzəm çempionatda xal sayına görə klub rekordunu yenilədi. Peter Ştyastnı 1981/82 mövsümündə 139 (46+93) xal toplamışdı. Amma mövsümün bombardiri Nikita Kuçerov oldu. “Tampa-Bey”in rusiyalı forvardı “Toronto” ilə oyunda qol və məhsuldar ötürmə ilə yadda qalmaqla xalını 144-ə (44+100) çatdırdı. 30 yaşlı rusiyalı MHL tarixinə 21-ci əsrdə ən azı 40 qol vuran və 100 məhsuldar ötürmə verən ilk hokkeyçi kimi düşdü. Ümumiyyətlə, bu liqanın tarixində yalnız iki oyunçu bir müntəzəm çempionat ərzində 40 qol vurmağı və 100 məhsuldar ötürmə verməyi bacarıb. Bunlar Mario Lemye (1988/89 mövsümündə 85 qol, 114 ötürmə) və Ueyn Qretskidi (1981-90-cı illər aralığında 11 dəfə).

Kuçerovla bağlı daha bir maraqlı statistika var. Rusiyalı ulduz komandasının bu mövsüm vurduğu qolların 49,49 faizində iştirak edib. “Tampa-Bey” müntəzəm çempionatda 82 oyunda 291 qol vurub. Bu oyunların 81-də buz üzərinə çıxan Nikita, yuxarıda xatırlatdığımız kimi, 144 xal toplayıb.
Artıq pley-offun ilk mərhələsində qarşılaşacaq cütlər bəllidi: Reyncers – Vaşinqton, Karolina – Aylenders, Florida – Tampa-Bey, Boston – Toronto, Kolorado – Vinnipeq, Vankuver – Neşvill, Dallas – Veqas, Edmonton – Los-Anceles. Pley-off oyunları aprelin 20-dən 21-nə keçən gecə start götürəcək. Stenli kubokunun son qalibi “Veqas”dı. Müntəzəm çempionatın yekun turnir cədvəlini qəzetimizin növbəti sayında dərc edəcəyik.

18 aprel
Aylenders – Pittsburq 5:4 (1:1, 2:2, 2:1)
Tampa-Bey – Toronto 6:4 (2:1, 3:0, 1:3
Dallas – Sent-Luis 2:1 Б (0:0, 0:1, 1:0, 0:0, 1:0)
Arizona – Edmonton 5:2 (1:1, 1:0, 3:1)
19 aprel
Minnesota – Sietl 3:4 (1:0, 0:1, 2:3)
Vinnipeq – Vankuver 4:2 (1:1, 1:1, 2:0)
Kalqari – San-Xose 5:1 (2:0, 3:0, 0:1)
Kolorado – Edmonton 5:1 (4:1, 1:0, 0:0)
Veqas – Anahaym 1:4 (0:0, 1:1, 0:3)
Los-Anceles – Çikaqo 5:4 ОТ (0:1, 3:0, 1:3, 1:0)