Dünən İspaniyanın şimalında, Bask bölgəsində yerləşən Bilbao şəhərində böyük bir izdiham və qələbəlik yaşandı.

Belə ki, bütün şəhər ''Atletik''in son zəfərini qeyd etdi. Bu komanda məlum olduğu kimi ötən həftəsonu penaltilər seriyasında ''Malyorka''nı məğlub edərək İspaniya kubokunun qalibi olmuşdu. 40 ildən sonra gələn bu zəfər böyük coşqu ilə qeyd olundu. ''Atletik'' sonuncu dəfə, yəni 1984-cü ildə qazandığı kuboku ''La Gabarra'' adlı gəmi ilə qeyd etmişdi. Həmin vaxtdan bu yana muzeydə olan bu gəmi dünən 40 ildən sonra ilk dəfə suya buraxıldı! ''Atletik''in futbolçuları və məşqçilər korpusu 18,5 metre uzunluğundakı ''La Gabarra''ya minərək belə desək, şəhər turuna çıxdılar. Gəmi şəhərin mərkəzindən keçən və Biskay körfəzinə qədər uzanan Nervion çayında 13 kilometrəlik yol qət etdi. Çayın kənarı boyunca bütün yolları kafeləri, evlərin balkon və pəncərələrini, terasları dolduran yüz minlərlə fanat ''Atletik''in bu uğurunu qeyd etdi. Bilbao şəhəri klubun rənglərinə, yəni ağ və qırmızıya büründü. ''Marka''nın xəbərinə görə klubun qələbəsini qeyd etmək üçün küçələrə 1 milyondan çox insan çıxmışdı! Bu zəfər şəhərin bələdiyyə binasında başa çatdı. ''Atletik'' tarixində 24-cü dəfə ölkə kubokuna sahib çıxdı və bu göstəricidə yalnız ''Barselona''dan (31) geri qalır. Tarixi ''La Gabarra'' gəmisinə gəlincə, o, 1980-ci illərin əvvəllərində inşa edilib. Həmin vaxt Bilbao İspaniya industriyasının önəmli şəhərlərindən hesab olunurdu. Maraqlıdı ki, 2015-ci ildə də gəminin muzeydən çıxarılaraq suya buraxılması gündəmə gəlmişdi. Çünki həmin vaxt ''Atletik'' İspaniya superkubokunu qazanmışdı. Amma sonradan gəminin muzeydə qalmasına qərar verilmişdi.

ƏLİ