Ölkə kubokunun yarımfinal mərhələsinin ilk oyununda “Qarabağ” “Neftçi”ni məğlub edib - 4:0.

“Football-plus.az” xəbər verir ki, matçdan sonra ağdamlıların çalışdırıcısı Qurban Qurbanovun mətbuat konfransı keçirilib. Sizi onun fikirləri ilə tanış edirik:

- Toral Bayramın performansı barədə fikirləriniz necədi? Gələcəkdə də yarımmüdafiə mövqeyində oynadacaqsız?
- Statistikaya baxsaq, yaxşı oyun göstərdi. Əvvəllər də o mövqedə onu oynatmışıq. O bacarıq onda var. Bu gün daha keyfiyyətli oynayır. Amma qollara baxsaq, fərqli düşünərik, digər epizodlara baxsaq, mövqe səhvləri var idi. Daha da bərk olmalıdı. Bunu mütləq bacarmalı, yaxşılaşdırmalıdı. Onu meydana əsas heyətdə buraxdıq, düzgün yararlana bildik. Daha diqqətli, məsuliyyətli olmalıdı.

- Son günlər "Qarabağ"ın futbolçularına xarici klublardan təkliflər var. Konkret kimə təklif gəlib?
- Dəfələrlə bildirmişəm ki, şan-şöhrətə tab gətirmək, dözmək çətindi. Amma klubumuza rəsmi təklif yoxdu. Məni narahat edən məqam da odu ki, çox yazılar olur, çox fikirlər bildirilir. Ayrı-ayrı futbolçularda hiss olunur ki, sanki onlara təkliflər çoxdu. Bəlkə bilmədiyimiz məqamlar var. Amma düzünü desəm, mən bunu meydanda da hiss edirəm. Əfsuslar olsun. Təkbətək danışanda fərqli cavablar alıram. Amma özlərini oyuna nə qədər hazırlaşdırsalar da, meydanda əvvəlki aqressiyası olmur. Bu da normal haldı. Hamımız bunu keçmişik. Yaxın vaxtlarda bunu aradan qaldıracağıq. Futbolçularım peşəkardı. Hamısı yaxşı insanlardı, sözə qulaq asan, əməl edən idmançılardı. Amma belə hallar…

- Bu gün Azərbaycan futbolu üçün yeni dönəm başladı. Sizin də adınız da İK-nin siyahısındadı. Gələcəklə bağlı AFFA rəhbərliyi ilə danışmısız?
- Mənə inanan hər kəsə təşəkkür edirəm. Ki, öz etimadlarını göstərirlər. Digər tərəfdən burda kollektiv müzakirə olunacaq fikirlər var. Hərənin öz təklifi ola bilər və bu da müzakirə olunacaq. bu günə görə fikir bildirə bilmərəm. Çünki ilk görüş sadəcə formal xarakter daşıyırdı. Bir ay ərzində yenidən bir araya gələcəklər və onda ilk müzakirələr başlanacaq. Gələcək üçün hədəf orda bildiriləcək. Bu məlumatlar mən tərəfdən yox, federasiya tərəfdən veriləcək. Lazım olsa, razı və yaxud da narazı, fikir bildirmək lazım olarsa, bunu bildirəcəyik. Yeni heyətə uğurlar arzulayıram. Hər zaman tərəfdarı olmuşam ki, hansısa qərarı…

- Bu gün şansınız olsaydı, Azərbaycan futbolunda nəyi dəyişərdiz?
- Bu gün "Qarabağ"ı dəyişməzdim. Bu haqda fikir bildirməyim düz olmazdı.

- Premyer-liqada çempion olduz, bu gün də "Neftçi"ni kubokda uddunuz. Bu hal komandaya gələcək oyunlarda necə təsir edəcək?
- Həmişə yaxşı qələbə komandaya inam verir, komandanın gücünü göstərir. Biz həm qalib gəldik, həm də xoşlamadığım elementlər oldu. Onları da müzakirə edəcəyik ki, futbolçular daha məsuliyyətli olsun. Ancaq pozitiv düşünürəm. "Neftçi" kimi komandaya qarşı qələbənin faydası çox olacaq.

- Adınız "Latsio" və digər klublarla yanaşı hallanırdı. Şəxsən özünüzə müraciət edən olub?
- Bu barədə çox danışmağa ehtiyac yoxdu. Mən öz fikirlərimi yayındırmaq istəmirəm. Hansısa uzaqdan-uzağa xəbər göndərirlər ki, olsa necə idi? Mənim cavabım qətidi, "Qarabağ"dayam. O haqda düşünmürəm.

- Keçən oyunda da "Neftçi" ilə matçda kifayət qədər azarkeş var idi, bu gün də. Niyə "Qarabağ"ın ev oyunlarında bu qədər azarkeş yığılmır? Səfər matçlarında daha çox azarkeşiniz olur...
- Nə bilim. "Neftçi" ilə ev oyunumuzda da az azarkeş olmayıb. Allah qoysa, gələrlər. Bəlkə də, mənə aid olan sual deyil. Biz həmişə azarkeşlərə müraciət edirik, onları stadionda görmək istəyirik. Təsəvvür edin ki, stadion boş olardı, matç yoldaşlıq görüşünə bənzəyəcəkdi. Azarkeşlər mütləq olmalıdı. Bu da bizə məsuliyyət verir. Bu, Azərbaycan futbolu üçün çox vacib elementlərindən biridi. Ki , azarkeşləri hansısa yolla stadiona cəlb edək. Avrokuboklarda olur. Amma çempionat matçlarını da eyni tempdə keçirməliyik.

- Çempionlar Liqasının reqlamentində dəyişiklik olub. İndidən ÇL haqda düşünürsüz? Sizcə bu dəfə daha çətin olmayacaq?
- Format dəyişilib. Amma dəyişilən nöqtəyə kimi eynidir. Biz qarşımıza ÇL-in qrupuna düşmək hədəfi qoryuruqsa, 8 oyunda qalib gəlməliyik. Sonrakı mərhələdi. Biz hər turnirdən maksimum iştirak etməyi qarşıya hədəf qoymuşuq. Komandanı ilk olaraq turnirə kimi sağlam qoruyub-saxlamalıyıq.