Misli premyer-liqasında 11-ci tura yekun vurulub.

"Football-plus.az" xəbər verir ki, "Qarabağ" "Araz-Naxçıvan"a uduzub - 1:2. Matçdan sonra ağdamlıların çalışdırıcısı Qurban Qurbanovun mətbuat konfransı keçirilib. Sizi onun fikirləri ilə tanış edirik:

- Demək olar ki, komanda oyuna tam hazır deyildi?
- Bir az psixoloji gərginlik və fiziki yorğunluq var idi. Oyuna daha ciddi yanaşmaq lazım idi. Belə hallar olur. Qarşıdakı oyunlarda bunları aradan qaldırmağa çalışacağıq. Komanda bir az oyun ritmindən düşüb.

- Buraxılan qolları necə şərh edərdiniz?
- Texniki səhvdi. Qol olmayası yerdən vurdular. İkinci qolda hörmətli hakimlərimiz cərimə zərbəsi verməli idilər. Rəqib Yankoviçə qarşı qaydanı pozmuşdu. Nəsə desək dəyişən bir şey olmayacaq. Son dəqiqələrdə belə qollar dəfələrlə görmüşük. Hakimlər diqqətli olmalıdı. Rəqib komandanın məşqçiləri çox istəkli kollektiv yaradıb. Nəticələri boşuna deyil.

- "Qarabağ"ın Xankəndidə oyunlar keçirəcəyi deyilir. Bu, cari mövsümdə nə dərəcədə realdı?
- Bu, mənə aid olmayan sualdı. Çünki, dövlət səviyyəsində verilməli olan qərardı. Belə qərar verilsə, biz orada oynamağa hazırıq.

- "Qarabağ" son illərdə mövsümə belə uğursuz start verməyib. Bu, nə ilə bağlıdı?
- Məğlub oluruqsa, səbəbini özümüzdə axtarmalıyıq. Bəzən rotasiyalar özünü doğrultmur. Futbolun qanunlarıdı. Böyük klublar da məğlub olurlar.

- Adama Diakabi istəkli görünürdü. Onu Avropa Liqasının qarşıdakı oyunları üçün UEFA-da sifariş ərizəsinə daxil etmək mümkündü?
- UEFA-da limit bağlanıb. Yanvar ayına kimi heç bir oyunçunu siyahıya əlavə edə bilmərik.