Misli premyer-liqasının 28-ci turunda “Qarabağ” “Kəpəz”i məğlub edib - 6:1.

“Football-plus.az” xəbər verir ki, matçdan sonra ağdamlıların baş məşqçisi Qurban Qurbanovun mətbuat konfransı keçirilib. Sizi onun fikirləri ilə tanış edirik:

- Klubda sonrakı hədəfiniz nədi?
- İşimiz elədi ki, daim uğur ardıyca getməliyik. Mövsümboyu yaxşı olmaq istəyiriksə, uğur qazanmalıyıq. Azərbaycan kimi ölkələrdə böyük uğurlar az olur. Futbol elədi ki, daim dəyişikliklər baş verir. Ölkədə gücümüzü saxlamalıyıq.

- Milli komandanın baş məşqçi postuna dəvət ediblər?
- İK olub. Mənə millinin baş məşqçiliyi təklif olmayıb. Olsa, bunu müzakirə etməliyik.

- Çempion olmaq ciddi iş tələb edir. Qarşıda turlarda komandanı necə hazırlayacaqsız?
- Növbəti oyunlara tam ciddi hazırlaşacağıq. Bəzi futbolçulara ola bilsin istirahət verdik. Fasilədə 5 futbolçuya istirahət verdik, faydası oldu. Amma milliyə dəvət olunan oyunçular istirahət etməyib, onlara şərait yaradacağıq. Onları gələn mövsüm çempionlar Liqasına tam hazırlamalıyıq.

- Benzianın durumu necədi?
- Benzianın zədəsi ciddi deyil. Məşqlərə sabahdan başlayacaq.

- Çempionluğu rəsmiləşdirəndən sonra futbolçularla nə danışdız?
- Təbrik etdim onları. Onlara görə yenə sevinirəm. Bəziləri çempion olmamışdı, bəziləri isə bir neçə dəfə qızıl medalları qazanıb.

- Heyəti qoruyub saxlamaq çətin olmayacaq ki?
- Heyəti qoruyub saxlamaq çətin olur. Buna çalışacağıq. Gələn il üçün komandanın potensialı var. Onların ustalıq səviyyəsini artırmağa çalışacağıq. Bəzən düşünmədiyimiz təkliflər olub, futbolçuları saxlaya bilməmişik. Amma çalışacağıq ki, əlimizdən gələni edək.

- AFFA-da vitse-prezident postu boşdu. Təklif olsa, münasibətiniz necə olar? Baş məşqçi kimi davam edəcəksiniz, ya təklifi qəbul edərsiniz?
- İnanmıram belə təklif olsun. Hələlik missiyam məşqçi olmaqdı. Hazırda burdayam, bu kollektivlə işləmək xoşdu. Müzakirə edilməyən mövzu haqda fikir bildirməyi xoşlamıram. İK-ya namizədliyim verilib, amma təsdiq olunmayıb. Rəsmiləşdikdən sonra fikir bildirmək olar.

- Son günlər oyunçuların intizmasızlığı müzakirə olunur, bu haqda fikirləriniz nədi?
- Bu şeyləri sevmirəm ki, oyunçularımın intizamsızlığından danışılsın. Futbol aqressiv oyundu. Dəfələrlə tələb etmişəm ki, hər nə olur olsun, özlərini intizamlı aparmalıdı. Məcburdular. Çünki biz kollektivik. Bəzən qırmızı vərəqələrdən sonra futbolçu özünü idarə edə bilmir. Elvində aqressivlik, cığallıq var. Qarşıdakı illərdə inanıram ki, bunlar aradan qaldırılacaq. Bu yaş dövründə yollarını aza bilərlər. Nərimana gəldiksə isə hansısa jurnalistlə diskusiyası alınmayıb. O elə uşaqdı ki, kəlbətinlə söz ala bilmirsən. Bəzən mənim ondan narazı olduğum hallar olur.

- U-23-də də problem yaşamışdı deyəsən. Guya zədəli olmadığı halda özünü elə göstərmişdi...
- Məncə o səhv məlumatdı. Zədəli olmağı ilə bağlı məlumatlar var idisə, səhvdi.

- İK-da 13 yerə 13 namizəd var. Və cəmi 2 futbol adamı var. Düşünürsünüz ki, sizə yük düşəcək?
- Formatdan məlumatsızam. Digər şəxslər arasında da futbol funksionerləri var. Amma məncə düşünülmüş addım atılıb. Ola bilər futbol inkişafı üçün və s. Hələlik təklif hazırlamamışam. Formatı bilmirəm. Bildikdən sonra gedişatda təkliflərimi irəli sürəcəm. Bu mövzu haqda fikir bildirmək üçün tezdi.

- Gürcüstan Avropa çempionatına vəsiqə qazandıqdan sonra federasiyada futbol adamlarının çox olması qabardıldı. Buna fikriniz nədi?
- Rəhbər vəzifələrdən uzaq olmuşam. Futbol oynamış şəxslərin belə qurumlarda çox olmasının tərəfdarıyam. Yeni rəhbərlik gəlir, nə necə olacaq bilmirəm, amma həmin şəxslərin təcrübəsindən faydalanmağın tərəfdarıyam.