"Sumqayıt"ın düşərgəsindən nə xəbər? - Samir Abasov açıqladı
"Sumqayıt" Misli premyer-liqasında uğurlu mövsüm keçirənlər sırasındadı.
"Gənclik şəhəri"nin təmsilçisi 27 turdan sonra 39 xalla turnir cədvəlinin 5-ci pilləsində qərarlaşıb. Yuxarı sıralarda xal fərqinin az olması böyük ümidlər vəd edir.
Belədə "kimyaçılar"ın son 9 turun oyunlarına ciddi hazırlaşması və rəqiblərini üstələmək üçün maksimum səy göstərməsi vacibdi. Bəs bu yöndə hansı işlər görülür? Düşərgədə ümumi ab-hava necədi?
Suallarımızı "Sumqayıt"ın baş məşqçisi Samir Abasova ünvanladıq. Onun "Football-plus.az"a söylədikləri:
"Komanda martın 20-də bir araya gəlib, gündəlik məşqlərə başlayıb. Yoxlama oyunu nəzərdə tutulmayıb. Heyətdən Kasimir Ninqa Çad, İsa Suliman Pakistan millisinin düşərgəsindədi. Roy Kehat narahatlığı olduğundan son iki məşqi buraxıb. Həkimlərimiz durumunun ciddi olmadığını və tezliklə məşqlərə qoşulacağını deyir. Qalan hər şey qaydasındadı. 4-cü dövrənin matçlarına hazırlaşırıq. Mövsümü bacardığımız qədər yuxarı pillələrdə bitirməyə çalışacağıq".
Qeyd edək ki, "Sumqayıt" martın 31-i, saat 18.00-da "Araz-Naxçıvan"ı qəbul edəcək.
KƏNAN BAHADIR
Digər xəbərlər
