Misli premyer-liqasının 27-ci turuna srağagün yekun vuruldu.

Daha doğrusu, 2-ci yer uğrunda amansız mübarizənin daha bir səhifəsi qapandı. Həmin yerə iddialılardan “Neftçi” və “Sabah” qələbə qazandısa, “Səbail” və “Sumqayıt” uduzdu. “Zirə”nin də qələbə qazanmasıyla zirvədə mübarizə gərginləşdi.

Turun ilk oyununda “Neftçi” ilə “Səbail” qarşılaşdı. Hər ikisi eyni xala malik olduğundan oyunun gərgin mübarizə şəraitində keçəcəyi anlaşılan idi. Sadəcə, “ağ-qaralar” rəqibə şans vermədi. Doğrusu, meydandakı oyuna və tablodakı hesaba baxanda təzad yaranırdı. Çünki “dənizçilər” ilk hissədən etibarən 2 top geriyə düşdükləri üçün maksimum dərəcədə rəqibi təzyiq altında saxlayır, lakin qol istəyinə çata bilmirdi. 3:0 hesabının qətiyyən oyunun axarına uyğun olmadığını iddia edə bilər. Hər halda, “Neftçi” məhz bu qələbə sayəsində 2-ci pilləyə yüksəldi. Sonradan aydın olacaqdı ki, cəmi ikigünlüyə.

“Zirə” – “Kəpəz” qarşılaşması isə “qartallar” üçün “U” dönüşü oldu. 2-ci yer uğrunda mübarizədən tədricən geri düşdükləri məqamda qazanılan qələbə onların işinə yaradı. “Zirə”nin baş məşqçisi Rəşad Sadıqov da yığma fasiləsinə qələbə ilə yollanmağın komandasının toparlanması baxımından yaxşı olduğunu bildirdi. “Sarı-göylər”, demək olar ki, premyer-liqada qalmağı təmin etsə də, Adil Şükürov məğlubiyyətdən narazıdı. Çalışdırıcı istədiyi aqressivliyi futbolçularında görmür. Düşünürəm ki, milli fasilənin yaranması “Kəpəz”ə də yaxşı mənada təsir edəcək. Çünki komanda stadionu təmirdə olduğundan ev oyunlarını fərqli yerlərdə keçirir. Oyunçular daim səfər etdiyindən çox yorulub. İkihəftəlik fasilə gəncəlilərə nəfəsini dərmək imkanı verəcək.

Bəlkə də çempionatda hazırda formada olmayan iki komanda varsa, biri “Qəbələ”di, biri də “Araz-Naxçıvan”. “Qırmızı-qaralar” artıq elitadan düşməyin biraddımlığındadı. Muxtar Respublika təmsilçisi isə mövsümün əvvəlindəki oyununu tam itirib. Oyun hər iki komanda üçün böyük əhəmiyyət daşıyırdı. “Liv Bona Dea Arena”, köhnə adıyla isə “Dalğa” stadionunda keçirilən görüşdə heç-heçə qeydə alındı. Amma nə Azər Bağırov istədiyinə çatdı, nə də Kaxaber Sxadadze. Çünki hər kəs bir-birinin yaxşı vəziyyətdə olmamasından xəbərdar idi. Sadəcə, Kurdiçin qırmızı vərəqəsi oyunun axarını dəyişdi. Hətta Sxadadze müdafiəçini hücumameyilli futbolçu ilə əvəzləsə də, qələbə hədəfinə çatmadı.

Avropa Liqasında mübarizəni dayandıran “Qarabağ” ardından ilk görüşə səfərdə çıxdı. Tovuza yollanan Ağdam təmsilçisi xoş və çal-çağırla qarşılandı. Tovuzlu azarkeşlərin “köhlən atlar” üçün açdığı pankartda “Avropadakı qürürumuz, Tovuza xoş gəlmisən” yazılmışdı. Bu oyunla bağlı çox danışmağa ehtiyac olmadığını düşünürəm. Çünki aşkar favoriti bəllidi. Fəqət Ayxan Abbasovun yetirmələrindən əzmkar mübarizə görmək, eyni zamanda dolub-daşan tribunalardan dəstəyi mübarizəyə rəng qatdı. Bu başqa məsələ ki, Tural Qurbanov 90+5-ci dəqiqədə tovuzluların qapısına yersiz penalti təyin etməklə bayram ab-havanı korladı.

“Sumqayıt” – “Sabah” görüşü turun son qarşılaşması oldu. Oyunu önəmli edən məqamlardan biri qalib komandanın 2-ci pilləyə yüksələcəyi idi. Masazır təmsilçisi bu mübarizədən üstün ayrıldı. Bununla da “bayquşlar” Krunoslav Renduliçin rəhbərliyi altında ardıcıl 2-ci qələbəsini qazandı və 2-ci yer uğrunda mübarizəni bir qədər də gərginləşdirdi. Samir Abasovun komandası isə bu məğlubiyyətlə 5-ci pilləyə düşdü. Millilər üçün fasilədən sonra komandaların necə mübarizə aparacağı böyük maraqla gözlənilir.

Misli premyer-liqası
3-cü dövrə, 27-ci tur
15 mart
Neftçi – Səbail 3:0
16 mart
Zirə - Kəpəz 2:1
Araz-Naxçıvan – Qəbələ 1:1
17 mart
Turan Tovuz – Qarabağ 1:3
Sumqayıt – Sabah 1:3
1. Qarabağ 27 21 3 3 71-23 66
2. Sabah 27 11 7 9 39-32 40
3. Neftçi 27 11 7 9 34-29 40
4. Zirə 27 10 9 8 21-18 39
5. Sumqayıt 27 10 9 8 26-32 39
6. Səbail 27 10 7 10 39-41 37
7. Turan Tovuz 27 9 8 10 41-38 35
8. Araz-Naxçıvan 27 8 8 11 27-36 32
9. Kəpəz 27 7 6 14 29-47 27
10. Qəbələ 27 4 4 19 20-51 16
Bombardirlər: Olavio Juninyo (Qarabağ) – 15, Aleksandr Ramalinqom (Səbail) – 11, Orxan Əliyev (Araz-Naxçıvan), Yassin Benzya (Qarabağ) - 9.
Növbəti turun proqramı
29 mart, 16.30. Qəbələ - Neftçi
29 mart, 19.00. Kəpəz – Qarabağ
30 mart, 16.30. Səbail – Turan Tovuz
30 mart, 19.00. Sabah – Zirə
31 mart, 18.00. Sumqayıt – Araz-Naxçıvan

KAMAL SƏFƏR