Misli premyer-liqasının 27-ci turunda "Qarabağ" "Turan Tovuz"u məğlub edib.

"Football-plus.az" xəbər verir ki, matçdan sonra Ağdam təmsilçilərinin baş məşqçisi Qurban Qurbanovun mətbuat konfransı keçirilib. Sizi onun fikirləri ilə tanış edirik:

- "Qarabağ" çempionluğu təmin edəndən sonra komandanı oyunlara motivasiya etmək çətin olmayacaq?
- Motivasiya ilə bağlı problemimiz olmayacaq. Daha yaxşı hazırlaşmalıyıq. Milliyə gedən oyunçular istərahət edə bilməyəcək. Digərlərinə istirahət verəcəyik. İnanmıram ki, hansısa çətinlik olsun. Öz oyunumuzun üzərində çalışaçacağıq.

- Milli fasilə ilə bağlı planlarınız nədi?
- Komandaya 4 gün istirahət verəcəyik. İnanmıram ki, yoxlama oyunu keçirək. Bakıda olacağıq.

- Mateus Silva mərkəz müdafiəçisi kimi necə təsir bağışlayır?
- Normal təsir bağışlayır. Amma mövqe səhvləri çoxdu. Üstün cəhətləri də var. Birə-bir mübarizələrdə sürətindən yaxşı istifadə edir. Oynadıqca özünü daha yaxşı hiss edəcək.

- Abdullah Zubir, Leandro Andrade, Juninyo kimi futbolçuları meydana buraxmaq əvvəlcədən planınızda var idi?
- Oyunun gedişatına görə addım atacaqdıq. Meydanda olan oyunçuların durumu vacib idi. Yorulanlar var idi. Amma əvvəldən Zubir və ya Juninyonun oynaması sırf planımda yox idi.

- İki eyni səviyyəli heyət saxlamaq üçün limit mane olur?
- Limit haqda nəsə deyə bilmərəm. Eyni səviyyədə iki heyət olsa, hamı oynamaq istəyəcək. Əlimdə olan futbolçular hamısı nəticə verən futbolçulardı. Gənclərə də şans veririk. Toral Bayramov, Elvin Cəfərquliyev yavaş-yavaş püxtələşir. Ümumən bugünkü heyətimizdən razıyam. Bəlkə 1-2 əlavə futbolçu olsaydı, pis olmazdı.

- Futbolçularınıza yayda təkliflər gələ bilər. Onlarla danışıqlara başlamısız?
- Heç bir danışıq yoxdu, hər şey qaydasındadı. Təklif olması da normaldı. Bu, gözləniləndi. Biz də istəyirik ki, komandanı qoruyub-saxlayaq. Mənim bildiyim qədərilə hələ ki, heç kimə rəsmi təklif yoxdu. Biz transfer bazarına girməliyik ki, Azərbaycan futboluna maraq böyük olsun.

- Martda çempionluğunuzu rəsmiləşdirmək üzrəsiz. Bu durumu necə şərh edərdiniz?
- Mən normal baxıram. Avropanın çox ölkələrində belə xal fərqi olub. Bu, o demək deyil ki, bizdə hamı bərbaddır. Ola bilər ki, bu il oyunumuz daha yaxşı alındı. Amma o demək deyil ki, hər il belə olacağıq.

- Yeni AFFA rəhbərliyi təklif etsə, AFFA İcraiyyə Komitəsində təmsil olunmaq istəyərsiniz?
- Biz Azərbaycan futbolu üçün çalışırıq. Tək özümü düşünməyim yaxşı olmaz. Bəzən olur ki, inciyirsən. Görsək ki, Azərbaycan futboluna faydası var, onda lazımi addımı atacağıq.