“Mənə FİF-in icraçı direktoru Tural Piriyev zəng edib ki, bir şirkət var, nümayəndələrinə Mingəçevir və Gəncədəki şəraiti göstərəcəm. Cavab verdim ki, heç bir problem yoxdu, buyurun, gəlin, ordakı əməkdaşlarımız sizi qarşılayacaq. Amma nə şirkət adı deyilib, nə bizə sponsor olmaq istəyindən danışılıb, nə də əməkdaşlıqla bağlı başqa məsələlər müzakirə olunub. Onu da qeyd edim ki, biz özümüz də sponsor axtarışındayıq. Bazaya kimlərisə dəvət edirik. Burda qeyri-adi nəsə yoxdu. Bizə dəstək verəcək hər bir şəxsin, şirkətin köməyində maraqlıyıq. Amma ortada nəsə olmadığı halda qeyd edirlər ki, “Kəpəz”lə bağlı 5 illik strategiyamız var”, “klubu irəli aparacağıq”. Bunu deyənlərə sual vermək lazımdı ki, siz nə vaxt gəlib “Kəpəz”in mövcud vəziyyəti, bazası, infrastrukturu, təmir və yenidənqurma işləriylə maraqlandız? Bəlkə klubun bir sıra öhdəlikləri var? Bu sadaladıqlarımdan xəbərsiz ola-ola, necə “Kəpəz”ə sponsor olmaq olar? Ümumiyyətdə, “F-Holdinq” haqda məlumatımız yoxdu, nə işlə məşğul olmasından da agah deyilik. Onu da deyim ki, bizə tərəf addım atanlara 10 addımla cavab veririk. Lakin maraqlarımızı bütün çılpaqlığıyla dilə gətirməliyik. Onlar bizi, biz də onları tanımalıyıq. Futbolu qoyaq kənara, məsələnin biznes tərəflərini daha çox fikirləşməliyik. Sponsor olacaq tərəflə işçilərimizin sayı, baza, infrastruktur, təmir işləri, akademiyamız, stadionumuzun gələcəkdəki vəziyyəti və s. haqda danışıqlar aparmalıyıq. Qısası, hüquqşünaslar, rəhbər şəxslər qarşılıqlı əməkdaşlığı geniş müzakirə etməlidi”.

“Bilindiyi kimi, Futbolun İnkişaf Fondu tərəfindən klublara sponsorların tapılması yönündə görüşlər təşkil olunur. Bu da növbəti səfər çərçivəsində reallaşıb. Gəlib infrastrukturla tanış olub gediblər. “Kəpəz”ə rəsmi müraciət daxil olmayıb və bu çərçivədə görüş keçirilməyib”.

“Bu məsələ ətrafında müzakirələrlə tanışam. Hadisələrin axarını izləyirik. Əvvəl bir mövzuya aydınlıq gətirim. Bilindiyi kimi, FİF-in yaradılmasında məqsəd klubların maliyyə dayanıqlılığının gücləndirilməsi istiqamətində işlər görməkdi. Qısası, biz indiyə qədər dəfələrlə şirkətlərlə görüşlər keçirmişik. Həqiqətən, futbola maliyyə ayırmaq istəyən çoxsaylı iş adamlarıyla danışmışıq. Fikir vermisizsə, bu yöndə xəbərlər mətbuatda yer almayıb. İlk dəfədi ki, hələ imzalar atılmadan hansısa şirkətin belə açıqlaması yayılır. Bunu onların təcrübəsizliyiylə əlaqələndirirəm. “Kəpəz”in rəhbəri İlqar Nadirinin müsahibəsiylə də tanışam. Onun fikirləriylə tam razıyam və dəstəkləyirəm. O qədər olub ki, potensial sponsor böyük vədlərlə çıxış etdiyi halda, hansısa detalda anlaşma əldə edilmədiyindən imzalar atılmayıb. O da baş verib ki, ümidsiz yanaşdığımız iş uğurla nəticələnib. Bu üzdən erkən danışmaq o qədər də doğru üsul deyil. Göründüyü kimi, “Kəpəz”in sponsora böyük ehtiyacı var. Bu işin alınmasında maraqlıdılar. Qarşı tərəf də müsbət danışır. Burda FİF-in rolu potensial sponsoru klubun infrastrukturuyla tanış etməkdi. İndi sözügedən şirkət rəsmi təkliflə çıxış etməlidi. İstəyini bildirməli və kluba sponsor olmaq məqsədini rəsmi tərzdə dilə gətirməlidi. Yəni konkret klub, qarşı tərəfin rəhbərliyi və FİF-in iştirakıyla görüşlər keçirilməli, vacib detallar ətrafında müzakirə aparılmalıdı. Ən azı bilirik ki, imzanın çəkiləcəyi ana qədər götür-qoy edilməli xeyli məsələ var. Tərəflərin münasibəti bir çox mövzuda üst-üstə düşməlidi. Yoxsa ortaq məxrəcə gəlmək çətin olur. İndiki durumda prosesin müsbət, yoxsa mənfi yöndə irəliləyəcəyi bəlli deyil. Konkret rəsmi razılaşma olmadıqca danışmaq yersizdi. Ümid odu ki, yarandığımız gündən bəri bizim üçün prioritet məsələ olan problem aradan qalxar və “Kəpəz” sponsoruna qovuşar. Bir gün tez və ya gec... Əsas məsələ hər iki tərəf üçün faydalı razılığın əldə olunmasıdı”.