“F-Holdinq” məsələsi klublar üçün sponsor axtarışımızın davamı kimi nəzərdə tutulan prosesin nəticəsidi. Birinci dəfə deyil ki, belə şirkətlərlə danışıqlar olur, görüşlər keçirilir. Yəni onların klublara sponsor olub-olmayacağı hələ dəqiq deyil. Hələ ki danışıqların ilkin mərhələsindəyik. Araşdırırıq, öyrənirik. Bilmək istəyirik ki, qarşı tərəf hansı təkliflərə açıqdı və ya maraqlarımızın üst-üstə düşdüyü məqamlar varmı? İndiki durumda “F-Holdinq”in klubla tanışlıq mərhələsindəyik. Potensial sponsor ümumi durumu öyrənməlidi ki, gözləntiləri bunun üzərinə qursun. Mingəçevir və Gəncəyə səfərin mahiyyəti də məhz bu idi. Burdakı fərqli məqam isə şirkət rəsmisinin açıqlamalarıdı. Mediaya belə məlumatların verilməsi məni təəccübləndirdi. Çünki hələ ilkin mərhələdəyik və uzun müddəti əhatə edən danışığımız olmayıb. Düşünürəm ki, hədəflərin, strateji planların açıqlanması üçün həddən artıq tələsiblər. Sponsorun olması üçün istək və ya müəyyən maliyyənin ayrılması bəs etmir. FİF olaraq bildirək ki, öncəliklə şirkətin kluba faydalı olub-olmayacağını təyin etməliyik. Strategiya isə klub rəhbərliyi ilə birgə razılaşdırılmalıdı. Ümid edirik ki, yaxşı olacaq, “Kəpəz” və ya “Mingəçevir” ilə tərəfdaşlıq müqaviləsinin imzalanmasına birgə nail olacağıq. Amma belə açıqlamaların razılaşdırılandan sonra səsləndirilməsinin tərəfdarıyıq. Hələ ortada bir şey yoxdu. Sponsorluq məsələsi elədi ki, imzalar atılana qədər dəqiq danışmaq olmur. Və bu bir ay da, bir il də çəkə bilər. İnşallah, tərəflər arasında bütün münasibətlər düzgün qurular və gələcəkdə tərəfdaşlığa mənfi təsir göstərəcək amillər qeydə alınmaz. Əsas funksiyamız budu və işimizi maksimum dərəcədə yaxşı görmək istəyirik. İlkin mərhələdə olduğumuz üçün sponsorluq müqaviləsi “Kəpəz”lə də, “Mingəçevir”lə də imzalana bilər. Heç biri olmaya da bilər. Yekun nəticəni zaman göstərəcək”.

“Klub rəhbərliyi olaraq, FİF-lə birgə çalışırıq. Bu, bizim və fond rəhbərliyi üçün hazırda ən prioritet məsələdi. Həm birlikdə, həm də ayrı-ayrılıqda müxtəlif səviyyələrdə görüşlər keçirilir, müzakirələr aparılır. İş adamları və şirkətlərlə danışıqlar olur. Təəssüf ki, hələ müsbət yöndə irəliləyiş yoxdu. İstər klubumuz, istərsə də FİF tərəfindən ayrı-ayrı şirkət təmsilçiləri mövcud şəraitlə tanış olmaq üçün bazaya dəvət olunur. Bəli, növbəti belə görüş keçirilib. Lakin hansısa razılıq əldə edilməyib. Sadəcə, bazaya baxış olub. Təbii ki, kluba sponsor tapılarsa, biz buna yalnız sevinə bilərik. Çünki məqsədimiz Gəncə futbolunu layiq olduğu yerə qaldırmaqdı”.