“Football-plus.az” saytda yer alan “Xabi Alonso üç titul xəyal edə bilər” sərlövhəli yazını təqdim edir:
“Yazının başlığı Alonsonun xoşuna gələcək. Çünki o, həqiqətən üç titul qazanmaq istəyir. İspaniyalının sevimli yarışması yoxdu. Hazırda həm Avropa Liqasına, həm bundesliqaya, həm də Almaniya kubokuna eyni dərəcədə məsuliyyətlə yanaşır. Mütəxəssisin oyunçuları da uğura acdı. “Bayer-04” bütün toylarda rəqs edə bilir. Hətta daha rahat da ola bilərlər. Hər oyunda rekord təzələyən komanda üçün “Bavariya” ilə aradakı 10 xal fərqi buna şərait yaradır. Odu ki, Alonso bu fürsətdən istifadə etməlidi. “Aspirinlər” Bakıdan çətinliklə əldə edilən bərabərliklə döndü. “Qarabağ”ın səfərdə daha yaxşı oynadığını nəzərə almaq vacibdi. Yosip Stanişiç haqlıdı. Qonaqlarımız ən kiçik səhvi belə bağışlamayacaq. Leverkuzenlilər Avropa səhnələrinin favoriti. Buna şübhəylə yanaşmırıq. Amma “Qarabağ”ın həmin səhnələrin sürprizi olduğu da reallıqdı. Ağdam təmsilçisinin onu kiçik görən “Braqa”nın başına açdığı bəla unudulmayıb. Yəqin ki, Alonso Jorjenin məyus simasıyla eyni emosiyaları yaşamaq istəməz. İnanın, “BayArena”dakı matç çox cəlbedici olacaq”.
KƏNAN BAHADIR
