“Bayer-04” ilə yenidən anlaşdı

Xabi Alonso “Bayer-04”ü hələ çox çalışdıracaq.

"Football-plus.az" xəbər verir ki, baş məşqçi ilə müqavilə yenilənib.

Leverkuzen klubunun saytının məlumatına görə, ispaniyalı mütəxəssislə imzalanan yeni sözləşmənin müddəti 2026-cı il iyunun 30-na kimi nəzərdə tutulub. Alonsonun “Bayer-04” ilə əvvəlki müqaviləsi 2024-cü ilin yayına qədər qüvvədə olacaqdı. 41 yaşlı məşqçi leverkuzenliləri ötən ilin oktyabrından çalışdırır. Komanda onun rəhbərliyi altında ötən mövsüm Avropa Liqasının yarımfinalınadək irəliləməyi bacarıb və Almaniya çempionatında 6-cı yeri tutub.

“Bayer-04” Alonsonun məşqçilik karyerasında ilk yüksək səviyyəli klubdu. O, buna qədər “Real” və “Real Sosyedad”da məşqçi işləyib. Alonsonun futbolçu karyerası ərzində “Real Sosyedad”, “Liverpul”, “Real” və “Bavariya”da çıxış etdiyini də xatırladaq.