"Şansların 70-in 30-a rəqibin xeyrinə olduğunu düşünürəm" - Elvin Məmmədov
Bu gün Avropa Liqasında 1/8 final mərhələsinin cavab oyunu çərçivəsində “Qarabağ” səfərdə “Bayer-04”lə qarşılaşacaq. Rəqibin cütün aşkar favoriti olduğu aydındı. Amma Qurban Qurbanov və komandası də dəfələrlə futbolsevərləri təəccübləndirməyi bacarıb.
Görəsən, Xabi Alonsonun 36 oyunluq məğlubiyyətsizlik seriyasına malik olan “alman maşını”nın qarşısını necə almaq olar? Ağdam təmsilçisi necə oynamalıdı ki, növbəti mərhələyə adlamağın mümkünlüyünə ümid edə bilək? Erkən qol buraxmaq yekun uğur baxımından nə dərəcədə önəmli olardı? Bu sualları millimizin sabiq futbolçusu Elvin Məmmədova ünvanladıq:
“İlk növbədə “Qarabağ”a uğurlar arzulayıram. Çətin oyun olacaq. Çünki qarşıda “Bayer-04” kimi güclü komanda var. Ona görə də “köhlən atlar” hər cəhətdən bu görüşə hazır olmalıdı. Komandanın necə oynamasının lazım olduğunu Qurban Qurbanov daha yaxşı bilir. İnşallah, ona uyğun da komandasını hazırlayacaq. Biz isə sadəcə, dua edərək dəstək ola bilərik ki, “Qarabağ” yaxşı nəticə qazansın. Real yanaşanda həqiqətən çox çətin görünür. Şansların 70-in 30-a rəqibin xeyrinə olduğunu düşünürəm. Çünki “Bayer-04” çox güclü komandadı. Lakin Ağdam təmsilçisi də böyük klublara qarşı həmişə daha yaxşı, daha əzmkar oyun nümayiş etdirib. Niyə də olmasın?! İnşallah, sevinən tərəf də “Qarabağ” olar”.
KAMAL SƏFƏR
Digər xəbərlər
