“Qarabağ” Avropa Liqasında mübarizəni dayandırıb.

Azərbaycan çempionu bu gecə turnir çərçivəsində növbəti oyuna çıxıb. Rəqib güclü və əzəmətli “Bayer-04” olub. “CBC Sport” oyunu canlı yayınlayıb.

Avropa Liqası, 1/8 final, cavab oyunu
Bayer-04 (Almaniya) - Qarabağ 3:2
Ceremi Frimponq, 71, Patrik Şik, 90+3, 90+7 - Abdullah Zubir, 59, Olavio Juninyo, 68
Qırmızı vərəqə: Elvin Cəfərquliyev, 64
"Bayer 04": Matey Kovar, Pyero İncape, Odilon Kossunu, Yonas Hofmann, Robert Endrix, Borxa İqlesias, Florian Virts, Edmond Tapsoba, Amin Adli, Ceremi Frimponq, Qranit Caka.
"Qarabağ": Andrey Lunyov, Elvin Cəfərquliyev, Bədavi Hüseynov, Julio Romao, Yassin Benzia, Marko Yankoviç, Abdullah Zubir, Bəhlul Mustafazadə, Leandro Andrade, Marko Veşoviç, Juninyo.
Hakimlər: ENTONİ TEYLOR, Qari Besuik, Adam Nann, Endryu Medli (hamısı İngiltərə).
VAR hakimi: Stüart Attuell (İngiltərə).
VAR hakiminin köməkçisi: Carred Qavan Cillett (Avstriya).
UEFA nümayəndəsi: Duşko Qrabovaç (Xorvatiya)
Hakim-inspektor: Rune Pedersen (Norveç)
14 mart. Leverkuzen, “BayArena”. Saat 00.00.
İlk oyun - 2:2.

Ağdam təmsilisi daha bir çətin rəqiblə qarşı-qarşıyadı. Bu dəfə rəqib Almaniya bundesliqasının məğlubedilməz lideri “Bayer-04”dü. Düzdü, “köhlən atlar” “Tofiq Bəhramov”da keçirilən ilk oyunun 1-ci hissəsində qələbə ümidi vermişdi, lakin sonradan özünü büruzə verən yorğunluq, rəqibin heyətindəki tutarlı əvəzetmələr oyunun axarını dəyişdi və “sülh” qeydə alındı. Azərbaycandan Leverkuzenə dikilən gözlərdəki ümid işığının səbəbi də məhz həmin nəticədi. Qurban Qurbanovun komandası “Zirə” ilə oyunun və uzun səfərin yorğunluğunu dərhal üzərindən atmalı və çətin oyuna köklənməlidi. “Aspirinlər” son 36 matçın 31-dən qələbə, 5-dən heç-heçə ilə ayrılıb. Qısası, “Bayer-04”ü dünya miqyasında dayandıran tapılmır. Onu da qeyd edək ki, üç futbolçu bu görüşdə baş məşqçi Xabi Alonsonun sərəncamında olmayacaq. Braziliyalı müdafiəçi Artur qasıq nahiyəsindən zədəlidisə, komandanın aparıcı hücumçusu Viktor Bonifasın əzələsində problem var. Həmçinin yarımmüdafiəçi Noay Mbamba da görüşü tribunadan izləməli olacaq.

“Qarabağ”a gəlincə, Elvin Cəfərquliyev, Julio Romao və Kevin Medinanın dönüşü şad xəbərlər sırasındadı. Qurban Qurbanov “Zirə” ilə oyunda daha faydalı oyunçulara istirahət verdiyindən bu matçda onların yaxşı təsir bağışlayacağına ümid edir. Üzücü məqam isə Juninyonun istənilən formada olmamasıdı. O mənada ki, hücumçu zədəsini yenicə sağaldıb.

İndi isə ağdamlıların Almaniya təmsilçiləriylə avrokubok sınaqlarına nəzər salaq. Xatırladaq ki, “köhlən atlar” indiyədək bu ölkənin 4 klubu ilə üz-üzə gəlib, oyunların 7-si bizimkilərin məğlubiyyətiylə yekunlaşıb. “Qarabağ” yalnız bir görüşdə heç-heçə etməyi bacarıb. Son çempion Almaniya klublarına qarşı oyunlarda 4 qol vurubsa, 18 qol buraxıb. Avropa Liqasının 2010/11 mövsümünün pley-off mərhələsində Dortmund “Borussiya”sıyla qarşılaşmalar səfərdə 0:4, Bakıda 0:1 hesabıyla bitib. Nəticədə təmsilçimiz avrokuboklarla vidalaşıb. İkinci görüş Avropa Liqasının 2013/14 mövsümünə təsadüf edib. Turnirin pley-offunda “Ayntraxt”la üz-üzə gələn kollektiv Bakıda 0:2, səfərdə 1:2 hesabıyla uduzub. “Qarabağ”ın Avropa Liqasının 2022/23 mövsümünün qrup mərhələsindəki alman rəqibi isə “Frayburq” olub. Səfərdə uduzan “köhlən atlar” (1:2) Bakıda heç-heçə edib – 1:1. Cari mövsümdə Avropa Liqasının qrup mərhələsindəki rəqib isə “Bayer-04” olub. Xabi Alonsonun yetirmələri evdə 5:1, Bakıda 1:0 hesablı qələbəyə imza atıb.

Göründüyü kimi, başlaması üçün saatlar saydığımız oyunda qələbə qeydə alınsa, bayram bayrama qarışacaq. Həm tarixdə ilk dəfə Almaniya təmsilçisini məğlub edəcək, həm də Avropa Liqasının 1/4 finalına vəsiqə qazanacağıq. Hələ “Bayer-04” kimi Almaniya nəhənginin 36 oyunluq məğlubiyyətsizlik seriyasına son qoyulmasını demirik! Uğurlar, “Qarabağ”!

KƏNAN BAHADIR