“Təbii ki, favorit “Bayer-04”dü. Hamı onun gücünü bilir. Amma digər tərəfdən “Qarabağ”ın matça rahat çıxacağını və rahatlığın da uğur qazandıra biləcəyini düşünürəm. Əsas odu ki, Ağdam təmsilçisinin istədiyini etməyə qadir oyunçuları var. O üzdən bu gün sürpriz də ola bilər. O ki qaldı Elvinlə Romaonun yoxluğuna, sözsüz, böyük itkidi. Amma “Qarabağ” hazırda bir maşın kimidi. Yəni kimin oynamasından asılı olmayaraq, komandanın bir sistemi, strukturu var. Buna görə də elə bir çətinliklə üzləşəcəklərini düşünmürəm”.

“Doğrusu, Qurban Qurbanovdan yaxşı heç kim bilmir ki, “Qarabağ” necə futbol oynasın. Bizim isə mütəxəssis kimi, sadəcə, fərziyələrimiz ola bilər. Biz də onu bilirik ki, Ağdam təmsilçisi daha effektiv top saxlaya bilir. Fəqət rəqib buna imkan verəcək-verməyəcək - bunu bilmirik. Burda keyfiyyət öz sözünü deyəcək. Biz “Qarabağ”dan çox şey gözləyirik, amma burda keyfiyyət məsələsi var. Fikrimcə, “köhlən atlar” burda nəsə edə bilər. Ancaq səfərdə şansları 10 faizdi. “Bayer-04”ə qarşı açıq futbol oynasaq, çətin olacaq. Çünki onların futbolçuları fərdi ustalıqları hesabına pressinqlərdən çıxacaqlar. Ona görə də müdafiədə oturub, rəqibi əks-hücumda yaxalamaq variantını düşünürəm. Bu mənim mütəxəssis fikrimdi. Amma rəqibin oyunlarını təhlil etsəm, bəlkə də başqa cür yanaşacam. Bu gün Elvin yoxdusa, Toral var. Və ya Romao yoxdusa, Yankoviçlə Patrik Andrade var. Sadəcə, söhbət ondan gedir ki, bu gün həmin mövqedə başqa futbolçular çıxış etsə belə, rəqibin oyunçularının üstünlüyünə görə həmin mövqedə mübarizə aparanların da üstün cəhətləri bizə görünməyəcək”.