Nə baş verməli, hansı möcüzə gerçəkləşməlidi ki, “Qarabağ” səfərdə Almaniya çempionatının liderini, bəlkə də bu gün üçün Avropanın ən güclü komandasını məğlub etsin? Heç şübhəsiz, bu suallar indi bütün Azərbaycanı düşündürür.
1/8 finalın ilk oyununun 2-ci hissəsi göstərdi ki, “Bayer-04” əsas heyətlə meydana çıxanda onunla mübarizə aparmaq çox çətindi. Özü də Bakıda. Bəs Virts, Caka, Şik və oyundaşları doğma “BayArena”da ilk dəqiqələrdən meydanda görünsə, nə olacaq? Doğrudanmı “Qarabağ”ı qrup mərhələsində olduğu kimi, yenə də darmadağın gözləyir? Xatırladaq ki, onda leverkuzenlilər Qurban Qurbanovun komandasına heç bir şans verməmişdi - 5:1.
“Qarabağ”a Almaniyada oynamaq həmişə çətin olub. Sürətli və atletik futbola üstünlük verən Almaniya təmsilçiləri qətiyyən ağdamlılar üçün uyğun rəqib deyil. Almanları öz azarkeşləri irəli səsləyəndə onların öhdəsindən gəlmək bir qədər də çətinləşir.
“Qarabağ” indiyə qədər artıq 4 dəfə Almaniyada oynayıb və hamısında uduzub. Topların fərqi isə 3:13-dü. Ağdamlıların bu ölkənin təmsilçiləri ilə yolu ilk dəfə 2010/11 mövsümündə, Avropa Liqasında kəsişib. Qrup mərhələsinə vəsiqənin taleyinin həll olunduğu pley-off oyunlarında Dortmund “Borussiya”sına səfərdə 0:4, evdə 0:1 uduzmuşuq. Üç il sonra Avropa Liqasının elə həmin mərhələsində “Ayntraxt”la qarşılaşan “Qarabağ” bu dəfə daha yaxşı təsir bağışladı. Ağdamlılar evdəki 0:2-nin ardından Frankfurtda layiqincə mübarizə apardı, bir neçə təhlükəli vəziyyət yaratdı, Reynaldonun qolu ilə təsəlli tapdı – 1:2.
Ardından “Frayburq”la duellər oldu. “Qarabağ” Avropa Liqasının 2022/23 mövsümünün qrup mərhələsində səfərdə 1:2 hesabıyla uduzdu. Qurbanovun komandası onda ilk 20 dəqiqəni çıxsaq, çox baxımlı oyun nümayiş etdirmişdi. Və nəhayət, “Bayer-04”lə payızda baş tutan və heç xatırlamaq istəmədəyimiz oyun. Bilirsizmi, “Qarabağ”ın Almaniyada keçirdiyi bütün bu oyunları nə birləşdirir? “Borussiya” ilə oyun – 13-cü dəqiqə. “Ayntraxt”la oyun – 10-cu dəqiqə. “Frayburq”la oyun – 7-ci dəqiqə. “Bayer-04” ilə oyun – 6-cı dəqiqə.
Bunlar “Qarabağ”ın ilk qolu buraxdığı dəqiqələrdi. Yəni Almaniya klubları ilə bütün səfər oyunlarında ağdamlılar qapısında erkən qol görüb. Bəlkə elə Almaniyada uğur qazanmağın sirri bu məqamda gizlənir? Bəlkə sadəcə, start təzyiqinin öhdəsindən gəlmək və ilk 15-20 dəqiqədə qol buraxmamaq lazımdı?
Əlbəttə, bu bir qədər sadəlövhlük kimi görünür. Enində-sonunda həlledici qolu uzatma dəqiqələrində də buraxmaq olar. Hər halda, “Qarabağ” start təzyiqini dəf etməyi bacarandan sonra lap bundesliqanın liderinə də öz oyun üslubunu “sırıya” bilər. Ən azı buna inanmaq istəyirik.
ELMİR ƏLİYEV, haqqin.az