Peşəkar Futbol Liqasının rəsmi saytı Misli premyer-liqasının 28-ci turunun oyun cədvəlini açıqladı.

Bəlli oldu ki, bir neçə gün öncə “Kəpəz”in “Qarabağ”ı “Tofiq Bəhramov”da qəbul edəcəyi haqda yaydığımız xəbər doğrudu. Elə bu anda dilimi dişlədim. Çünki yadıma “Neftçi”nin baş məşqçisi Miodraq Bojoviçin sözləri düşdü. Xatırladım ki, o, 26-cı “Kəpəz” – “Neftçi” oyununun Tovuzda keçirilməsinə etiraz etmişdi. Daha sonra PFL-dən sorğumuza cavab verildi ki, mütəxəssisin narazılıq etməsi anlaşılan olsa da, hansısa qayda pozuntusundan söhbət getmir. Yəqin monteneqrolu qara-qara düşünür. Bəlkə də deyir ki, “Qarabağ”la “Tofiq Bəhramov”da qarşılaşırsansa, mənimlə də “Neftçi Arena”da görüşməliydin.
Biz məsələyə fərqli yöndən yanaşmaq istəyirik. İnsafla yanaşsaq, cənab Bojoviç, hazırda narazılıq etməyə, kimisə qınamağa haqqınız yoxdu. Axı “ağ-qaralar” sizin baş məşqçiliyiniz dövründə səfərdən heç vaxt qələbəylə qayıtmayıb! İnanmırsız? Buyurun!

19-cu tur: “Sabah” – “Neftçi” 0:0
21-ci tur: “Sumqayıt” – “Neftçi” 2:1
22-ci tur: “Araz-Naxçıvan” – “Neftçi” 1:0
24-cü tur: “Turan Tovuz” – “Neftçi” 1:1
26-cı tur: “Kəpəz” – “Neftçi” 3:3

Görünür, günahkar ya “Dalğa Arena”, ya “Bank Respublika Arena”, ya “Mehdi Hüseynzadə”, ya Tovuz şəhər stadionu, ya da sizsiz!

KƏNAN BAHADIR