"14 gün ərzində Tovuza iki dəfə səfər etmişik. Məndə olan məlumata görə, "Kəpəz" bundan sonra ev oyunlarını Sumqayıtda keçirəcək. Yalnız bizi Tovuzda oynamağa məcbur edirlər. Bu, düzgün deyil, qaydalara ziddi. Bir komanda mövsüm ərzində 3-4 fərqli stadionda oynayır..."

"Mioqrad Bojoviçin fikirləriylə tanışıq. İlk növbədə onu bildirək ki, başqa klublarla olduğu kimi, "Neftçi" ilə Peşəkar Futbol Liqası arasında işgüzar münasibətlər də qaydasındadı. Bütün məqamlar 2023/24 mövsümünün təsdiqlənmiş Əsasnaməsinə uyğun şəkildə tənzimlənir. Belə ki, mövsümün gedişində bir klubun ev oyunlarını keçirdiyi stadionda fors-major hal yaşanarsa, Əsasnamənin 9-cu maddəsinin 2-ci bəndi işə düşür. Yəni Gəncə şəhər stadionunda əsaslı təmir və yenidənqurma işləri aparıldığı üçün klub Peşəkar Futbol Liqası tərəfindən qəbul olunmuş istənilən stadionda ev oyununu keçirə bilər. Stadionun sayıyla bağlı məhdudiyyət yoxdu. Düzdü, bir neçə il öncəyə qədər say iki idi, lakin bu, effektiv olmadığı üçün hazırkı Əsasnamədə tələblər fərqlidi. Qısası, "Neftçi"nin "Kəpəz"lə Tovuz şəhər stadionunda qarşılaşmasında qaydalara zidd bir şey yoxdu. Üstəlik "Kəpəz" Tovuzda yox, PFL tərəfindən qəbul olunmuş, paytaxtdakı və ya regiondakı hər hansı başqa stadionda da oynasa, buna qarşı da çıxa bilməzdik. "Neftçi"nin baş məşqçisinin fikirlərini ümumi mənada anlayışla qarşılayırıq. Komandaya rahat olardı ki, Tovuzda yox, Bakıda, Qəbələdə və ya Sumqayıtda oynasın. Amma PFL meydan sahibinin rəsmi şəkildə bildirdiyi və qaydalara cavab verən stadionda oynamasına etiraz edə bilməz. Eyni fors-major hal "Neftçi" üçün də keçərli olsa, yenə eyni qaydalar tətbiq olunacaq".

"Mövsümün gedişində fors-major hallar meydana gələrsə (qazonun vəziyyəti pisləşərsə, oyunun keçirilməsi üçün ciddi əngəllər yaranarsa), PFL tərəfindən stadionda oyun keçirilməsinə qadağa qoyula bilər. Problemlər aradan qaldırılmayınca qadağa qüvvədə olacaq. Sifariş olunan stadionda problem yarandığı təqdirdə klub matçlarını PFL-in təsdiq etdiyi digər stadionlarda keçirmək üçün ən qısa zamanda PFL-ə yazılı müraciət etməlidi. Yalnız müvafiq qərardan sonra matç PFL tərəfindən qəbul edilmiş digər stadionlarda keçirilə bilər".