Sabah "Qarabağ" Avropa Liqasının 1/8 final mərhələsinin cavab matçında "Bayer-04"ün qonağı olacaq.

"Football-plus.az" xəbər verir ki, oyundan öncə ağdamlıların çalışdırıcısı Qurban Qurbanovun mətbuat konfransı keçirilib. Sizi onun fikirləri ilə tanış edirik:

“Bizim üçün çox vacib oyundu. Son vaxtların ən yaxşı komandalarından biri ilə qarşılaşacağıq. Cavab oyununda daha da diqqətli olmalıyıq. Bu stadionda yenidən oynamaq xoşdu. Bütün fikrimizi bu görüşə yönəltmişik. Çox keyfiyyətli komanda ilə oynayacağıq. Sabah uğurlu nəticə qazanmağa çalışacağıq. 90 dəqiqə çox diqqətli olmalıyıq.

Mütəxəssis hücumçu Olavio Juninyonun durumu barədə danışıb: “Onun əsas heyətdə olub-olmaycağı bilinmir. Qarşıda bir məşqimiz var. Onu kimin əvəzləyəcəyini düşünməməliyik. Yetərincə futbolçumuz var. İstənilən oyunçudan yararlana bilərik. Çox sıx qrafikdə oynayırıq. “Bayer”in son matçlarına baxsaq, onlar da çox vacib və sıx qrafikdə olublar. Onların hazırlıq planı daha yaxşıdı. Futbolçularıma əlavə vaxt və penaltilər barəsində heç nə deməmişəm. Ümumilikdə buna uyğun məşq planımız olub. Biz 90 dəqiqəyə motivasiya olaraq meydana çıxırıq. Hər iki tərəf üçün 90 dəqiqədə qalib gəlmək yaxşıdı. Futbolçuları nəzərə almaq lazımdı”.