“Bildirmişdim ki, bizim də xeyli təcrübəmiz var”
Avropa Liqasının pley-off mərhələsinin ilk oyununda “Qarabağ” “Braqa”nı məğlub edib - 4:2.
“Football-plus.az” xəbər verir ki, matçdan sonra ağdamlıların çalışdırıcısı Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:
“Hesab 4:2 oldu. Amma bu, hələ ilk hissədi. Bu cür komandalar bu cür turnirlərdə istənilən nəticəni öz xeyirlərinə dəyişə bilərlər. Biz arxayınlaşmalı yox, əksinə cavab oyununda daha ciddi olmalıyıq. Futbolçularımı təbrik edirəm”.
- Həm "Sabah"la oyunda həm də bu gün komandanın müdafiəsi etibarlılığı ilə seçilmirdi. Yaxın günlərdə bu mövqeyə təcili transfer gözlənilir?
- Yox. Transfer pəncərəsi bağlanıb. Bəli, istəməzdim ki, son oyunlarda bu qədər qol buraxaq. Bunun üzərində çalışırıq. Bu gün iki qolu da standart vəziyyətdən buraxdıq. Biri küncdən zərbədən, biri penaltidən. Hər oyunda qapımızda qol görürüksə, daha ciddi yanaşmalıyıq. Təkcə müdafiə xəttində oynayan futbolçular yox, kollektiv şəkildə müdafiədə daha ciddi olmalıyıq.
- 4:2 hesablı qələbəni sensasiya hesab etmək olar?
- Proqnozlara fikir vermirəm. Real baxsaq, bəlkə favorit hesab edənlərin fikri düzdü. Bu gün həm reytinqə, həm də komandanın çıxış etdiyi çempionata görə, bu fikirlər normaldı. Amma mən bildirmişdim ki, bizim də xeyli təcrübəmiz var. Həm Bakıda, həm səfərdə vacib görüşlərimiz olub. Futbolçularımızın təcrübəsi artıb. İnanırdıq. Bəlkə də 4 qol vurarıq deyə düşünmürdük. Amma futbolçularımızdan tələbimiz odu ki, hər hücumda daha keyfiyyətli olsunlar. Allaha şükürlər olsun, oyun pis alınmadı.
Digər xəbərlər
