“Bayer” təkcə nəticələri ilə deyil, baxımlı oyunu ilə də bundesliqada liderdi. Yaxşı, bacarıqlı futbolçulardan təşkil olunmuş komandadı. Çox istəkli, bacarıqlı, zəngin futbolçu karyerasına malik baş məşqçiləri var ki, öz oyunu, davranışı ilə hamımızın rəğbətini qazanıb. O, futbolçu kimi necə olubsa, məşqçi kimi də ciddi, tələbkardı və futbolçulardan da bunu istəyir. Biz də çalışacağıq ki, çox diqqətli olaq, bu komandaya qarşı çox yaxşı mübarizə aparaq. Oyunçularım buna hazırdılar. Futbolçular ən yaxşı oyunlarından birini göstərəcəklər. Komandanın hazırlıq planı hər oyunda fərqli olur. Çünki müxtəlif komandalara qarşı oynayırıq. Bu rəqib isə 2-3 fərqli sistemlə oynaya bilir, rotasiyalar edir. Çox ciddi olmalıyıq. Komandanı rəqiblə bacardığımız qədər tanış etdik. Belə rəqiblərlə görüşlərdə motivasiya vermək həm asan, həm də çətin olur. Daim istəmişəm ki, futbolçularım bu dinamikanı, sürəti hiss etsinlər. Komandanı bacardığımız qədər motivasiya etmişik. İnanıram ki, futbolçular səhv etsələr də, oyun nizam-intizamını sonadək qoruyub saxlaya biləcəklər”.