“Yaxın günlərdə kollektiv şəklində bir araya gəlib illik plan və hədəflərimizi müəyyənləşdirəcəyik. Bilindiyi kimi, iş prinsipimiz maliyyə azlığıyla üzləşən klublara dəstək olmaqdı. Ötən ilə qədər fondumuzun prioriteti “Turan Tovuz”la “Kəpəz”ə sponsorun tapılması idi. Ölkə futbolunda aparılan islahatlar nəticəsində klubların sayı artdığından işimiz ağırlaşdı. İndi premyer-liqayla yanaşı, 1-ci və 2-ci liqa klublarıyla da əməkdaşlıq edirik. “Turan Tovuz” və “İmişli”də bu problemin aradan qaldırıldığını bilirsiz. Başqa komandalara da kömək etmək istəyirik ki, bu sırada “Kəpəz” də var. Lakin hansısa klubu irəli çəkmək, məhz onu ön planda saxlamaq düzgün deyil. Sözün açığı, əməkdaşlarımızın sayı da az olduğundan bu hal qaçılmaz olur”.

“Hələ ki məhz “Kəpəz”lə maraqlanan iş adamı və ya şirkət yoxdu. Daha öncə bir neçə layihə var idi ki, müəyyən səbəblərdən reallaşmadı. Elə sponsor istəyik ki, əməkdaşlıq uzunmüddətli və dayanıqlı olsun. Sponsorun tapılması prosesini asanlaşdırmaq üçün bu yaxında həm gəncəli iş adamları, həm də şirkəti Gəncədə fəaliyyət göstərən sahibkarlar ilə görüşəcəyik. İnşallah, bundan sonra “Kəpəz” rəhbərliyinə və azarkeşlərinə şad xəbər verə bilərik. Biz geri çəkilməmişik, klublarımızın rifahı üçün çalışmağa davam edəcəyik. Ümid ən sonda ölür”.