“Yarışla bağlı təəssüratlarımız çox yaxşıdı. Çox maraqlı və gözəl turnir təşkil etmişdilər. Rəhbərliyimizə də təşəkkür edirik ki, bizi belə turnirlərə göndərir. Komandamız 4 ay ərzində yığılsa da, gördük ki, düzgün iş var. Yarışda çox səviyyəli, güclü akademiyalar var idi. İstər məşqçilər, istərsə də uşaqlar üçün böyük təcrübə oldu. Harda çatışmazlığımız var, onlardan nədə geri qalırıq - bunları gördük və müzakirə etdik. A qrupunda Belarusun BATE, "Minsk", "Start", həmçinin Rusiyanın "Zenit" komandaları ilə birlikdə qərarlaşmışdıq. Bir gündə 3 oyun keçirdiyimiz üçün bizim uşaqların gücü, potensialı çatmadı. Yaralı yerimiz o idi ki, Bakıda oynadığımız reqlamentlə orda oynadığımız reqlament arasında yerdən göyə qədər fərq var. Bakıda oynadığımız meydança ordakından üç dəfə kiçikdi. Qapıçımız bəzən qapıda görünmürdü. Onlar indidən böyük meydanda oynayırlar. Ən böyük fərq də onda idi. Lakin biz əlimizdən gələnin ən yaxşısını etməyə çalışdıq. Komandamdan, oyunumuzdan elə də narazı qalmadım. "Zenit"i məğlub etmək şansımız olsa da, 2-ci hissədə gücümüz çatmadı. Onlar artıq gündə 3-4 oyun keçirməyə, böyük stadionda oynamağa öyrəşib. Buna baxmayaraq, hər şey qənaətbəxşdi. Gələcəyə ümidlə baxırıq. Ən azı bu səviyyəni, çatışmazlıqlarımızı gördük. Bacardığımız qədər onları aradan qaldırmağa çalışacağıq”.