"Mayın 5-7-si aralığında Acarıstan Futbol Federasiyasının dəvətiylə "Shota Cup" turnirində iştirak etdik. Maraqlı və fərqli yarış oldu. Hər qrupda 5 komanda yer almışdı. Qrupda 2 qələbə, 1 heç-heçə ilə lider olduq. Pley-offda “Çaykur Rizəspor"u 1:0, yarımfinalda "Qildani"ni 2:0 məğlub etməklə finala çıxdıq. Həlledici qarşılaşmada bizimlə bir qrupda mübarizə aparan Batumi "Dinamo”su ilə münasibətləri aydınlaşdırdıq. Oyun çox gərgin keçdi. Hesabı açsaq da, rəqib son dəqiqələrdə bərabərliyi təmin etdi. Matç uzatma dəqiqələrinə getdi. Hesab yenə dəyişmədi və oyunun taleyi penalti seriyasında həllini tapdı. Burda daha dəqiq oynamaqla 8:7 hesabıyla qalib gələrək yarışın qalibi olduq. Batumidəki turnir uşaqların inkişafı üçün çox faydalı oldu. Belə turnirlər tez-tez keçirilməli və bütün Azərbaycan klublarının aşağı yaş qrupları iştirak etməlidi. Ayxan Əliyev “Shota Cup”un ən yaxşı oyunçusu seçildi. Bu bizim Gürcüstanda keçirilən turnirlərə sayca 3-cü iştirakımız və uğurumuzdu. İlk dəfə "Sabutalo"nun təşkilatçılığı ilə keçirilən "Tbilisi Cup"da, sonra martda "Akademi Cup"da iştirak edərək zəfər qazanmışdıq. Ümid edirəm ki, uğurlarımızın davamı gələcək".