Diasın atası başına gələnlərdən danışdı
Xəbər verdiyimiz kimi, oktyabrın 28-də Kolumbiyanın Barrankas şəhərində Milli Hərəkat Ordusu tərəfindən qaçırılan “Liverpul”un ulduzu Luis Diasın valideynləri artıq azad edilib.
Futbolçunun anası Silenis Marulandanı dərhal azad etmək mümkün olmuşdusa, Venesuela ilə sərhəddə saxlanılan ata Manuel Dias yalnız 12 gündən sonra BMT-nin və katolik kilsəsinin üzvlərinə təhvil verilmişdi. Luis Dias yalnız srağagün vətəninə yollanaraq atasına qovuşub. 26 yaşlı futbolçu ailə üzvləri və atası ilə görüşüb. Onların hər ikisi bir-birinə sarılaraq göz yaşlarını saxlaya bilməyib. Bu arada Manuel Dias Kolumbiya mətbuatına başına gələnlər haqda diqqətçəkən açıqlamalar verib:
“Mənə çox çətin idi. Çünki heç cür gözümə yuxu getmirdi. 12 gün yuxusuz qalmaq çətindi. Özümü narahat hiss edirdim. İlk 2-3 gündə, ümumiyyətlə, heç nə yemədim. Həm də daim bir yerdə qalmırdıq. Məni gah ora, gah bura aparırdılar. Düzünü desəm, qaçırılmağımın səbəbini inditə qədər də anlaya bilmirəm. Çünki bizim heç kimlə problemimiz yox idi. Kolumbiyanı tərk etmək barədə düşünürəmmi? Xeyr. Barrankas doğma şəhərimdi. Uşaqlıqdan burda böyümüşəm. Ailəmiz də burdadı. Atam burda dəfn olunub. Anam və bir çox qohumlarım indiyə qədər də burda yaşayır”.
Qeyd edək ki, bu hadisə üzündən “Liverpul”un iki oyununu buraxan Dias noyabrın 5-də “Luton”la səfər matçında sonradan meydana çıxdı. Son saniyələrdə komandasını məğlubiyyətdən xilas edən ulduz futbolçu qoldan sonra formasının altında yazılmış “atamı xilas edin” sözünü nümayiş etdirdi.
Digər xəbərlər
