"O demək deyil ki, gələn-gedənin 6 qol vura biləcəyi komandayıq" - baş məşqçi 0:6-nı şərh etdi
Martın 6-7-də futbol üzrə ölkə çempionatının 1-ci liqasında 17-ci turun oyunları keçirildi. Diqqətçəkən nəticələrdən birinə Yevlaxda şahidlik etdik. "Karvan" "Şamaxı"ya böyük hesabla uduzdu - 0:6. Əlbəttə, çempionluq iddiasında olan komandanın biabırçı məğlubiyyəti azarkeşlərini narahat etməyə bilməz.
Görəsən, “Karvan”ın belə duruma düşməsinin səbəbi nədi? "Doğma divarlar" arasındakı acınacaqlı məğlubiyəti necə izah etmək olar?
"Karvan"ın baş məşqçisi Kənan Kərimov “Football-plus.az”a məğlubiyyəti belə şərh etdi:
"Düzü, oyun haqda çox danışmaq istəmirəm. Onu deyə bilərəm ki, bizim üçün şok sürpriz oldu. Əsas heyətdən üç oyunçumuz yox idi. Rəqibin hücumları ya qolla nəticələnirdi, ya da çox təhlükəli alınırdı. Amma bu o demək deyil ki, gələn-gedənin 6 qol vura biləcəyi komandayıq. Hesab belədisə, deməli, bütün nöqtələrdə problem olub. Belə hallara da hazır olmalıyıq. İrəlidə 10 tur var. Çalışacağıq ki, qalan oyunlara köklənib hədəfimizə çataq".
Kənan bəy Rəvan Həmzəzadənin idarəçiliyi haqda sualımızı da cavabladı:
"Hakim nəticəyə təsir edən səhvə yol vermədi. Hansı qərar uyğun idisə, onu da verdi. Qərəzdən söhvət gedə bilməz. Ədalət təmsilçisi haqda mənfi rəy bildirmək doğru olmaz".
KƏNAN BAHADIR
Digər xəbərlər
