“Yaşananları bazaya hücum yox, kluba etiraz kimi qiymətləndirmək lazımdı”
Misli premyer-liqasının 25-ci turuna təsadüf edən Azərbaycan derbisi hər baxımdan Bakıda böyük futbol ab-havası yaşatdı.
Meydanda komandaların, tribunalarda azarkeşlərin gərgin mübarizəsinə şahidlik etdik. Sonda “Qarabağ”ın “Neftçi”ni darmadağın etməsi isə bakılıların bir neçə azarkeşini özündən çıxardı. Söhbət onların paytaxt təmsilçisinin bazasına daxil olub pirotexniki vasitələrdən yararlanmasından, ictimai asayişi pozmasından gedir. Qəzetimizin ötən sayında bu haqda məlumat vermişdik. Xatırladaq ki, məhkəmənin qərarı ilə Arif Dadaşov 30, Ceyhun Quliyev 15 sutka inzibati həbs cəzalı alıb, Vasif Rzayevlə Sabir Nəzərov cərimələnib. Bu dəfə məsələni daha ətraflı araşdırmaq qərarına gəldik.
Əvvəlcə qeyd edək ki, “Forza Neftçi” bu mövzuda geniş məlumat almaq istəyimizi geri çevirdi. Onu öyrəndik ki, məlum hadisənin iştirakçıları fanklub üzvü deyil. Belədə fərqli mənbələrə müraciət etdik. Düzü, hadisə haqda dəqiq informasiya kasaddı. Çünki narazı azarkeşlər bazaya oyun günü təxminən 23.00-dan sonra yollanıb və həmin vaxt binada, demək olar ki, heç kim olmayıb. Qısası, məlum videodan başqa detallı nəsə yoxdu.
Mövzunu dərinləşdirmək məqsədilə “Neftçi”nin azarkeşlərlə əlaqələndiricisi Aqil Məmmədquliyevə üz tutduq. O, qəzetimizə açıqlamasında məsələyə aydınlıq gətirdi:
“Yaşananları bazaya hücum yox, kluba etiraz kimi qiymətləndirmək lazımdı. Bilirik ki, “Neftçi”nin azarkeşləri çox tələbkardı və bunda haqlıdılar. İllərdi ciddi uğur qazanılmayıb. Hər kəs yorğundu. Gözləməkdən, hər dəfə ümidlənməkdən beziblər. Yenə də bu şəkildə etiraz olunmasını qətiyyətlə qınayırıq. Baxmayaraq ki, həbs olunanlar və cərimə edilənlər səmimi münasibətimiz olan şəxslərdi. Hadisəyə gəlincə, mən başverənləri öyrənən kimi bazaya yollandım. Fərrux Mahmudov bildirdi ki, azarkeşlərdən şikayət etməyə ehtiyac yoxdu. Emosional olduqlarını başa düşmək lazımdı. Çünki həmin an hisslər çox qarışıq idi. Təəssüf ki, tərəfdarlar “polisə müqavimət” və “hədə-qorxu gəlmək” maddələriylə həbs olundu. Qalan iki azarkeş isə səhv etmirəmsə, 200 manat məbləğində cərimələnib. Klub sevənlərini çox yaxşı başa düşür və belə halları anlayışla qarşılayır. Əsas komandanın nəticələri düzəlmədikcə etiraz səsinin ucalması başadüşüləndi. Şəxsən məni maraqlandıran məsələ isə fərqlidi. Görəsən, “Neftçi” özündən zəif komandalara uduzanda niyə belə etiraz etmədilər? Xoşumuza gəlməsə də, reallığa əsasən “Qarabağ” daha güclüdü”.
Bundan başqa, sözügedən videoda mühafizə xidmətinin hadisələrin axarına müdaxilə etməməsi diqqəti çəkir. Aqil bəy səbəbi belə izah etdi:
“Təlimlərdə pirotexniki vasitə daşıyanlarla necə davranmağın yolları öyrədilir. Burda təəccüblü nəsə yoxdu. Həmin əşya partlayıcı funksiyaya sahib ola bilər. Olmasa da, yüksək dərəcəli temperaturda yandığı üçün əlavə təsirlər üzündən partlaya bilər. Odu ki, həmin anda müdaxilə etməmək ən yaxşısı idi. Həmçinin azarkeşlər etiraz zamanı əlavə hansısa əşyalardan istifadə etməyib”.
Yeri gəlmişkən, “Neftçi” də srağagün bu hadisə ilə bağlı bəyanat yayıb: “Qarabağ”la matçdan sonra 4 azarkeş məğlubiyyətə etiraz etmək məqsədilə klubun inzibati binasının ərazisində pirotexniki vasitələrdən istifadə edərək asayişi pozub. Bildirmək istərdik ki, baş verən hadisə ilə bağlı heç bir şikayət bildirməmişik. Hüquq-mühafizə orqanları qanunvericiliyin tələblərinə əsasən həmin şəxsləri məsuliyyətə cəlb edib”.
Yeri gəlmişkən, “Neftçi” də srağagün bu hadisə ilə bağlı bəyanat yayıb: “Qarabağ”la matçdan sonra 4 azarkeş məğlubiyyətə etiraz etmək məqsədilə klubun inzibati binasının ərazisində pirotexniki vasitələrdən istifadə edərək asayişi pozub. Bildirmək istərdik ki, baş verən hadisə ilə bağlı heç bir şikayət bildirməmişik. Hüquq-mühafizə orqanları qanunvericiliyin tələblərinə əsasən həmin şəxsləri məsuliyyətə cəlb edib”.
KƏNAN BAHADIR
Digər xəbərlər
