“Neftçi”nin iki azarkeşi həbs olundu, daha ikisi cərimələndi
“Doğma divarlar” arasında “Qarabağ”dan alınan sarsıdıcı məğlubiyyət “Neftçi” azarkeşlərini necə qəzəbləndiribsə, “Forza Neftçi”nin bir qrup üzvü oyundan sonra klubun bazasına hücum çəkib.
Sosial şəbəkələrdə yayılan videoda onların 6 nəfər olduğu görülür. Azarkeşlər bazanın ərazisinə məşəl atmaqla klub rəhbərliyinə xəbərdarlıq edib:
"Bu nəticələr davam etsə, daha pis şeylər olacaq. Bu klub düzəlməlidi. Ya komandanı qaytarın bizə, ya da cəhənnəm olub gedin, işimizi bilək. Hamı təmiz vicdanla işləsin, nəticə əldə edək. "Neftçi" sizin şəxsi mülkünüz deyil ki, bu günə qoyasız. Hamı öz kefindədi. Haradasız? Hardadı klub rəhbərliyi, futbolçuları bazaya yığıb danlasın”.
Dünən isə bu məsələ davam edib. Daha doğrusu, polis “Neftçi”nin Xətai rayonunda yerləşən bazasına bir qrup azarkeşin hücum etməsi ilə bağlı yayılan məlumatı araşdırıb. Daxili İşlər Nazirliyinin Mətbuat Xidmətindən verilən məlumata görə, ictimai asayişi pozan şəxslər – Arif Dadaşov, Ceyhun Quliyev, Vasif Rzayev və Sabir Nəzərov polis əməkdaşları tərəfindən müəyyən olunaraq saxlanılıb. Onlar barəsində toplanmış materiallar baxılması üçün məhkəməyə göndərilib. Məhkəmənin qərarı ilə Dadaşov 30, Quliyev 15 sutka inzibati qaydada həbs olunub, qalan iki şəxs isə cərimələnib.
Digər xəbərlər
