Millimizin futbolçusu Rahil Məmmədov yanvarda "Qarabağ"dan ayrılıb Polşa çempionatının autsayderi LKS ilə müqavilə imzaladı.

Türkiyədə təlim-məşq toplanışı keçən komanda mövsümün ikinci yarısına yüksək liqada qalmaq məqsədi ilə başladı. Lakin ilk turlarda yaşanan məğlubiyyətlər lodzluların işini xeyli çətinə salıb.

Hazırda LKS 10 xalla sonuncu - 18-ci sıradadı. 17-ci pillədə isə 18 xalla "Ruch" qərarlaşıb. Göründüyü kimi, Rahilin komandasının durumu ürəkaçan deyil.

"Football-plus.az"a daxil olan məlumata görə, bu hal futbolçunu çox narahat edir. Polşa mətbuatının tez-tez Məmmədovu hədəf alması, yəni tənqid etməsi, vacib epizodlarda yol verdiyi səhvləri qabartması isə vəziyyəti daha da qəlizləşdirir. Oyunçu psixoloji cəhətdən sarsılmaq istəmədiyindən LKS-dən ayrılmaq haqda da düşünür.

Bəs komandanı tərk etsə, karyerasına harda davam etməlidi? Xatırlayırsızsa, futbolçu özü "Futbol+"ə "Qarabağ"a geri dönüb-dönməyəcəyini zamanın göstərəcəyini və LKS-dən başqa hansısa klubdan təklif almadığını açıqlamışdı. Çox güman ki, Rahil hazırda "köhlən atlar"a qayıtmaq barədə götür-qoy edir.

Görəsən, baş məşqçi Qurban Qurbanov onu yenidən heyətdə görmək istəyərmi? Belədə mütəxəssisin mətbuata danışarkən dəfələrlə qurduğu cümlə yada düşür: "Burdan gedən hər kəsə qapımız açıqdı".

KƏNAN BAHADIR