“Sumqayıt” - “Kəpəz” (1:3) matçında meydan sahiblərinin vurduğu yeganə qolun müəllifi İsa Suliman oyun barədə fikirlərini bölüşüb.

“Football-plus.az” xəbər verir ki, ingiltərəli müdafiəçi Samir Abasovun əksinə, azarkeşlərdən razılıq edib.

- Əlbəttə, çox məyusuq. Çünki ev oyununda qələbə qazanmaq istəyirdik. Əfsuslar olsun ki, buna nail ola bilmədik. Növbəti matçımızda çalışacağıq ki, vəziyyəti xeyrimizə dəyişək.

- “Qarabağ”a məğlubiyyətin acısı “Kəpəz”lə oyununuza da psixoloji təsir göstərdi?
- Hər iki oyundan məğlub ayrılmaq yaxşı deyil. Doğrudu, psixoloji cəhətdən təsir edir. Amma bu hər komandada ola bilər. İndiki durumda isə biz ardıcıl iki görüşdə məğlub oluruq. Bəlkə də yaxşı perioddakı formamızda deyilik. Bu durumu dəyişmək üçün bütün gücümüzlə çalışacağıq.

- Növbəti turda “Səbail”lə çətin səfər matçınız var. Bu oyun barədə nə düşünürsən?
- Mövsümün son hissəsidi. Bütün komandalar yuxarı pillələrdə yer almaq üçün var gücüylə oynayır. Həmçinin biz də bunun üçün çalışırıq. Növbəti görüşdə qələbə qazanmaq istəyirik. Ən azı “Qarabağ”la və “Kəpəz”lə oynadığımız oyundan daha yaxşı çıxış edək ki, qələbə qazanaq.

- İndiki gündəm azarkeşlərdi. Samir Abasov da bu haqda fikirlərini mətbuat konfransında bildirdi. Sən bu barədə nə düşünürsən? Azarkeşlərə mesajın nədi?
- Bura gələndən bəri həmişə azarkeşlərimizdən razı qalmışam. Onların mənə münasibəti daim yaxşı olub. Hətta səfərdə oynadığımız qarşılaşmalarda belə uzaq məsafə qət edərək, bizə dəstək olublar. Əlbəttə, istəyərdik ki, bütün oyunlarımızda “Neftçi” ilə görüşümüzdəki kimi stadion dolu olsun. Amma bu təkcə bizim yox, ümumi Azərbaycan futbolunun problemidi. Çünki başqa oyunlarda da görürük ki, stadionlarda nə qədər azarkeş olur. Hətta “Qarabağ”ın Avropa Liqasındakı oyunları xaric ölkə çempionatındakı matçlarında stadionu boş olur. Bu təkcə “Sumqayıt”ın problemi deyil.

KAMAL SƏFƏR