“Sabah” Misli premyer-liqasının ötən mövsümünü 2-ci yerdə başa vurdu.

Masazır təmsilçisinin 36 tur üçün nəticələrini xatırladaq. 25 qələbə, 6 heç-heçə, 5 məğlubiyyət yaşayan komanda 75 qol vurubsa, 24-nü buraxıb. Nəticədə 81 xalla (çempion “Qarabağ”dan 9 xal geridə, bürünc medalçı “Neftçi”dən 13 xal irəlidə - red.) gümüş medallara yiyələnən “tələbələr” tarixində ilk dəfə Konfrans Liqasına vəsiqə qazandı. Latviyanın RFŞ komandasını ümumi hesabda 4:1 məğlub edən kollektivin növbəti rəqibi Serbiya “Partizan”ı oldu. Bu rəqiblə ilk oyun evdə keçirildi və “Sabah”ın qələbəsiylə sona çatdı – 2:0. Cavab görüşü isə unudulmaz anlarla tarixə düşdü. Elə bu məqamda mətləbə keçmək üçün niyə məhz aylar öncəyə döndüyümüzü açıqlamağa ehtiyac var. Göründüyü kimi, Masazır təmsilçisi haqda indiyə qədər bəhs etdiklərimizdə cüzi uğursuzluqdan belə söhbət getmir. Qısası, Serbiya səfərinə qədər kimsə deyə bilməzdi ki, “bayquşlar” bugünə - fevralın 29-na olan nəticələrə görə əvvəlki halından əsər-əlamət qoymayacaq. Sanki klubu ardıcıl zərbələrlə “nokauta salıblar”. Niyə belə qənaətə gəlməyimizin səbəblərinə nəzər salaq.

Xain Mikels... Xəyanətkar “bakılı balası”...
2021-ci ilin iyulundan “Sabah”ın üzvü olan Coy-Lens Mikels 69 oyunda 33 qol, 20 məhsuldar ötürməylə yadda qalmışdı. Əlbəttə, göstəriciləri ona ağız sulandıran təkliflərinə gəlməsinə səbəb olmuşdu. Onun komandasını dəyişməsi, daha çox pul qazanmaq üçün başqa yerə üz tutması anlayışla qarşılana bilərdi. Lakin futbolçu məhz “bayquşlar” evdə “Partizan”la qarşılaşacağı vaxt meydana çıxmaqdan imtina etdi! Düzdü, masazırlılar həmin oyundan üzüağ çıxdı, lakin onun varlığı meydan sahiblərinin daha böyükhesablı qələbəsinə zəmin yaradacaqdı. Belədə komanda səfərdə çətin anlar yaşayıb Konfrans Liqasında mübarizəni dayandırmaya bilərdi. O isə “Bakılı balasıyam” musiqisinə qol-qanad açıb oynayaraq könlünü fəth etdiyi azarkeşləri bir neçə gün sonra “belindən bıçaqladı”. Qısası, “qəbirqazanlar” ləqəbiylə tanınan “Partizan”a “bel” oldu. Belədə onsuz da Aleksey Kaşukun gedişiylə “qan itirən” komanda növbəti dəfə “yaralandı”.

Namiqin öldürdüyü avrokubok ümidləri...
“Partizan”la Belqradda qarşılaşan kollektiv növbəti mərhələyə adlaya bilmədi. Oyunun əsas vaxtı rəqibin xeyrinə başa çatdı – 2:0. Belədə əlavə vaxt oynanıldı və hesab dəyişmədiyindən penalti seriyasına ehtiyac duyuldu. Murad Musayevin yetirmələri bu seriyada məğlub oldu. “Qurbanlıq qoyun” isə sonuncu şansı əldən verən Namiq Ələsgərov oldu. Çünki qapıçı “nöqtə”yə yaxınlaşan futbolçunun zərbəsini dəf etdi. Hakim qolkiperin zərbədən əvvəl xətdən irəli çıxdığını qeydə alaraq təkrar vuruş təyin etsə də, oyunçu yenə dəqiq olmadı. Bununla “Sabah”ın avrokubok macərası bitdi. Qısası, bir mövsümlük əziyyətin bəhrəsi bir qoldan asılı idi ki, Namiq bütün ümidləri puç etdi...

Bahalı transferlər, ucuz nəticələr...
“Sabah” yeni mövsümün hazırlığına başlayanda “Qarabağ”dan sonra növbəti favorit statutusunda idi. Sən demə, ilk turda evdə “Qələbə”nin darmadağın edilməsi (5:0) həm də “bayquşlar”ın enişinin başlanğıcı imiş. 5-ci turda eyni məkanda “Turan Tovuz”a böyükhesablı məğlubbiyyət (0:3) isə bunun növbəti carçısı oldu. Yay “transfer pəncərəsi”ndə Rəhman Daşdəmirov, Sofian Çakla, Jarl Marqarita, Vensan Till, Maruan Hadudi, Ayaz Quliyev, Cesse Sekidika, Kahim Parris və İshak Belfodil kimi futbolçuların transfer edilməsi tərəfdarların ürəyincə olsa da, gözləntilər nəticələrə yansımadı. Mövsümün gedişində üzə çıxdı ki, oyunçular ya komandaya uyğunlaşmaqda çətinlik çəkir, ya da qiyməti baha, performansı dəyəriylə uzlaşmayanlardı.

“El Profesor”un günbatımı, Ponomaryovun alatoranı...
Yarımbaşlığın ilk hissəsində söhbət “Sabah”ın sabiq baş məşqçisi Murad Musayevdən gedir. “Tələbələr”in ölkə kubokunun 1/4 finalında evdə “Qarabağ”a uduzması (1:7) rusiyalı mütəxəssisin istefasıyla nəticələndi. Beləliklə, 20 tur ərzində 26 xal toplayan Murad bəyə yol göründü. Bundan sonra klubun idman direktoru İqor Ponomaryovun dönəmi başladı. “Bayquşlar” onun rəhbərliyi altında son 4 turda 5 xal toplaya bilib. Daha dəqiqi, kollektiv hazırda 31 xalla 7-ci pillədədi. “Sabah” bu göstəriciylə, sadəcə, debütant “Araz-Naxçıvan”ı və tarixinin bəlkə də ən bərbad mövsümünü yaşayan “Kəpəz”lə “Qəbələ”ni qabaqlayır ki, komanda 20-ci turdan bəri, sadəcə, Gəncə təmsilçisini məğlub edə bilib – 3:2.

Avropa gecələri, yoxsa çempionatın zülməti?
“Bayquşlar”ın ümumi durumu azarkeşləri üçün arzuolunan deyil. İnsafən, bərbad da deyil. Premyer-liqada qarşıdakı həftələrdə son 12 turun oyunlarına şahidlik edəcəyik. “Sabah”ı ikinci sırada olan “Sumqayıt”dan çox yox, cəmi 5 xal ayırır. Təbii ki, üst yerlərdəki komandaların ab-havası daha yaxşıdı, amma ümidsiz olmağa dəyməz. Necə deyərlər, top yumrudu, meydan düz. Məsələyə məşhur “futboldu, hər şey ola bilər” prinsipiylə yanaşsaq, Masazır təmsilçisinin avrokubok şansının sıfra bərabər olduğunu demək düzgün deyil. Kollektivin mövsümün sonunda ilk “dördlük”də qərarlaşmaq ehtimalı var. Bu alınmasa, “futbol ili”ni 5-ci və ya 9-cu sırada bitirmək arasında hansısa fərq yoxdu. Seçim “bayquşlar”ındı. Ya azarkeşlərinə minimum Konfrans Liqasında Avropa meydanlarının hərarətini yaşadacaqlar, ya da ehtiraslarını növbəti mövsümə qədər cilovlamalı olacaqlar...

KƏNAN BAHADIR