Çin yığmasının yeni baş məşqçisi müəyyənləşib.

"Football-plus.az" xəbər verir ki, komandaya Branko İvankoviç təyinat alıb.

Bu barədə yerli federasiyanın mətbuat xidməti məlumat yayıb. Buna qədər komandaya Aleksandr Yankoviç başçılıq edirdi. İvankoviç əvvəllər İran və Oman yığmalarını da çalışdırıb. 69 yaşlı xorvatiyalı məşqçi 2009-11-ci illərdə başçılıq etdiyi “Şandun Lunen” ilə 2010-cu ildə Çin çempionatının qalibi olub. Onun ölkənin əsas komandasına təyinatına məhz bu uğuru şərait yaradıb.

Qeyd edək ki, İvankoviç karyerası ərzində ölkəsində “Varteks”, “Seqesta”, “Riyeka” klublarını çalışdırandan sonra 1998-99-cu illərdə ölkənin əsas komandasında köməkçi-məşqçi kimi işləyib. Sonra “Hannover-96”, İranın U-23 və əsas yığması, Zaqreb “Dinamo”su, “Şandun Lunen”, “Əl-İttifaq”, “Əl-Vahda”, “Persepolis”, “Əl-Əhli” və Oman yığmasına başçılıq edib.