“Baş məşqçimizlə ilk dəfə telefonla danışandan sonra bura gəlməklə bağlı heç bir şübhələrim qalmadı. Cəmi 5 dəqiqəyə məni razı sala bildi. O, “yoxlayacağıq”, “çabalayacağıq” kimi şablon ifadələr söyləmədi. Qətiyyətli şəkildə “edəcəyik” dedi. Özünəinam, motivasiya və hirs məhz mənə lazım olan şeylər idi. “Pendikspor”a qarşı son matçda vurduğumuz ikinci qol zamanı bütün hərəkətlərimiz doğru idi. Komanda yoldaşlarım düzgün yerlərə açıldılar. Bunları məşqlərdə dəfələrlə təkrarlayırıq. Hər kəs əvvəlcədən hansı epizodda hara qaçacağını, nə edəcəyini bilir. Tərifə layiq məqamlardan biri də “Trabzonspor”un daxilində gördüyüm intizam və futbolçuların özlərini komandaya həsr etmələridi. Mən idman hirsini, eləcə də hirsli olan insanları sevirəm. Çempionluq artıq çətin görünür. Amma baş məşqçimizlə görüşdə də mənə dedi ki, “Trabzonspor”un bu mövsümkü hədəfi ən azı 3-cü pilləni tutmaq və ölkə kubokunu qazanmaqdı. Özü də bunu çox qətiyyətli şəkildə dilə gətirdi. Onun danışıq tərzi xoşuma gəldi. Məşqçidə belə keyfiyyətlərə önəm verirəm. Komanda olaraq nəyi bacara və nələri daha yaxşı edə biləcəyimizin fərqindəyik. Trabzon gözlədiyimdən də gözəl şəhərdi. Avropa şəhərlərinə bənzəyir. İnsanları istiqanlıdı. Klub bazası da çox xoşuma gəldi. Hər şey peşəkar səviyyədə qurulub. Hətta bura bəzi şeylərdə Dortmund “Borussiya”sının bazasını da üstələyir. Türkiyə çempionatı isə dünya futbolunda layiq olduğu dəyəri görməyən turnirlərdən biridi”.