Dünən Türkiyə çempionatının 30-cu turu çərçivəsində sürpriz nəticə qeydə alındı.

Tarixi xal fərqi ilə əmin addımlarla çempionluğa doğru irəliləyən ''Trabzonspor'' gözlənilmədən Qaradəniz derbisində səfərdə ''Çaykur Rizəspor''a 2:3 hesabı ilə boyun əydi. Superliqada 13 oyunluq məğlubiyyətsiz seriyası qırılan ''Trabzonspor'' mövsümdə cəmi 2-ci dəfə məğlub oldu.

Düşmə zonasında qərarlaşan Rizə təmsilçisi isə 7 oyunluq qələbəsiz seriyaya son qoydu. ''Bordo-mavililər'' Abdulla Avcının dönəmində səfərdə 31-ci superliqa matçında ilk dəfə 3 top buraxdılar! Ən əsası ''Trabzonspor'' öz rekordunu təkrarlamaq fürsətini əldən verdi. Bu oyuna qədər komandanın 70 xalı varı idi. 30-cu turlar etibarilə trabzonluların rekord göstəricisi 73 xal idi. Komanda bu göstəriciyə 1995/96-da nail olmuşdu. Amma Rizədə yenilməklə ''Trabzonspor''un xalı 70-də qaldı. Bu görüşdə ''Çaykur Rizəspor'' Yoel Pohyanpalonun 3 penalti qolu ilə qalib gəldi. Finlandiyalı forvard bununla da bir sıra maraqlı göstəricilərə imza atdı.

Pohyanpalo turnirin tarixində bir oyunda ''Trabzonspor''a penaltidən 3 qol vuran ilk futbolçu oldu. Maraq üçün bildirək ki, superliqada sonuncu dəfə bir oyuna penaltilərlə het-trik edən futbolçu 2011-in mayında ''Ankaragücü'' ilə qarşılaşmada ''Fənərbaxça''nın əfsanəsi Aleks de Souza olmuşdu. Özü də Pohyanpalo bu qolları sonradan meydana çıxaraq vurdu. Bu da o deməkdi ki, superliqa tarixində ilk dəfə bir mövsümün gedişində sonradan meydana çıxan 2 futbolçu het-trik etdi. 15-ci turda ''Çaykur Rizəspor''la ev oyununda ''Fənərbaxça''lı Sərdar Dursun da bu cür şəkildə het-trik etmişdi.