“Trabzonspor” bu mövsümdəki ən diqqətçəkən transferi Pol Onuaçudan qarşıdakı oyunlarda faydalana bilməyəcək.

“Football-plus.az” xəbər verir ki, bilindiyi kimi, Trabzon təmsilçisi 201 sm boya malik nigeriyalı forvardı mövsümün əvvəlində “Sauthempton”dan icarəyə götürüb. 29 yaşlı hücumçu Türkiyədə heç də pis təsir bağışlamır. Onuaçu bu mövsüm superliqada 15 qarşılaşmada meydana çıxıb və 9 qol, 3 məhsuldar ötürmə olmaqla 12 qolun vurulmasında yaxından iştirak edib. O xüsusilə son 9 oyunda 6 qol, 2 məhsuldar ötürməlik performansı ilə “Trabzonspor”un yüksəlişində böyük rol oynayıb. Amma Onuaçu bu gün start götürəcək Afrika Millətlər Kubokuna yollanmalı olub. Əslində onun adı Nigeriya yığmasının heyətində yox idi. Sadəcə, “Real Sosyedad”lı Umar Sadiq zədələndiyindən Nigeriya Futbol Federasiyası yığmanın düşərgəsinə məhz Onuaçunun çağırıldığını açıqlayıb! Bu, qaradənzililər üçün heç də yaxşı xəbər olmadı. Komanda zatən buna qədər Nikolya Pepeni Kot d`İvuar, Mahmud Trezeqeni isə Misir yığmasının düşərgəsinə buraxmalı olmuşdu. Qarşıda “Trabzonspor”u çətin oyunlar gözləyir. Xüsusilə də növbəti həftəsonu, yəni 21-ci tur çərçivəsində “Qalatasaray”a qarşı ev oyunu var. Bu da o deməkdi ki, həmin prinsipial matçda Pepe və Trezeqe ilə yanaşı, Onuaçu da komandaya yardım edə bilməyəcək! Düzdü, “Cim-Bom” da eyni səbəb üzündən mərakeşli Hakim Ziyeşlə konqolu Sedrik Bakambunu itirib. Turnir fevralın 11-nə qədər davam edəcək. Nigeriya finala qədər irəliləyəcəyi təqdirdə “Trabzonspor” fevralın əvvəllərində keçiriləcək “Beşiktaş”a qarşı daha bir vacib oyunda da əsas qol silahından faydalana bilməyəcək. Sonda onu da vurğulayaq ki, Afrika Millətlər Liqasında karyerasını Türkiyə çemionatında davam etdirən ümumilikdə 31 futbolçu çıxış edəcək.