Dünən premyer-liqanın 26-cı turunda ''Nyukasl'' ''Arsenal''a qarşı səfər oyununda 1:4 hesabı ilə darmadağın oldu.

"Football-plus.az" xəbər verir ki, Loris Kariusun zəif performansı yenə sosial şəbəkələrdə gündəm oldu. Çox inamsız təsir bağışlayan və sadə qollar buraxan Karius əslində ''Nyukasl''ın 3-cü qapıçısıdı. Sadəcə əsas qapıçı Nik Poup uzun müddətə sıradan çıxıb. İkinci qapıçı Martin Dubravka isə oyundan öncə özünü yaxşı hiss etmədiyindən onu əsas heyətdə Karius əvəzlədi. Maraqlıdı ki, 30 yaşlı qapıçı peşəkar karyerasında 364 günlük fasilədən sonra ilk rəsmi oyununa çıxdı. O, sonuncu dəfə ötən ilin fevralın 26-da liqa kubokunun finalında ''Mançester Yunayted''ə qarşı oyunda forma geymişdi. Həmin vaxt da ''Nyukasl'' məcburiyyətdən Kariusu oynatmış və 2 cavabsız qolla məğlub olmuşdu. Karius futbol dünyasında 2018-ci ildə Çempionlar Liqasının finalında buraxdığı kuryoz qollarla məşhurdu. Həmin mövsümdən sonra onun karyerası sürətli eniş yaşamağa başladı. 2018-dən sonra 2 mövsüm ''Beşiktaş''da forma geyən almaniyalı qapıçı faktiki olaraq 2020-dən bu yana ortalıqda yoxdu. Bunu rəqəmlər də sübut edir. Karius son 4 mövsümdə cəmi 7 (!) rəsmi oyunda forma geyib. Bu oyunlardan 5-ni Almaniya təmsilçisi ''Union''un, 2-ni isə ''Nyukasl''ın heyətində keçirib.

ƏLİ