“Braqa” ilə cavab görüşündən sonra hər kəsin dilində iki ad var idi: Nəriman Axundzadə, Marko Yankoviç.

Nərimanla bağlı məsələ aydındı, ilk oyunda inanılmaz şansı qaçırmışdı, özümüzküdü, son dəqiqələrdə tarixi qol vurdu. Amma bu matçın adamı birmənalı şəkildə monteneqrolu yarımmüdafiəçidi. Hər kəsin ümidlərinin öldüyü vaxtda topu topu 25-30 metr daşıyıb həlledici cərimə zərbəsi qazanmaq asan deyildi. Bu üzdən Yankoviçin 120 dəqiqə ərzində yorulmadam çalışdığını (yeri gəlmişkən, bir dəfə tribunaları da dəstəyi artırmağa çağırdı), inanılmaz ustalıq və fədakarlıq göstərdiyini görən hər kəs “Qarabağ”ın yox, istənilən Avropa klubunun futbolçusu olsaydı, indi 15 milyon avroya satılardı” deyir. Halbuki Marko 2022-ci il iyunun 20-də “Qarabağ”la müqaviləyə imza atanda qiyməti 125 min avro idi.

“Football-plus.az” bu futbolçunu sizə bir qədər də yaxından tanıdır. Marko 1995-ci il iyulun 9-da o vaxt hələ Yuqoslaviya İttifaq Respublikası adlanan, özündə Serbiya ilə Monteneqronu birləşdirən ölkənin Setinye şəhərində dünyaya gəlib. Məşhur “Partizan”ın yetirməsidi, peşəkar futbolçu karyerasına elə burda başlayıb, ardından “Teleoptik”, OFK, “Partizan” (hamısı Serbiya), “Olimpiakos” (Yunanıstan), “Maribor” (Sloveniya), SPAL, “Krotone” (hər ikisi İtaliya), “Beytər”, “Hapoel” (Təl-Əviv, hər ikisi İsrail) klublarında çıxış edib. Futbolçunun ən yüksək transfer qiyməti 2018-ci ildə qeydə alınıb. Həmin vaxt SPAL-da çıxış edən Markonun dəyəri 2,5 milyon avro olub. 125 min avro qarşılığında “Qarabağ”a transfer olunan yarımmüdafəçinin indiki dəyəri 600 min avrodu. “Qarabağ”a “Hapoel”dən gəlib, Ağdam klubunun seleksiyaçıları onu uzun müddət izləyəndən sonra 2022-nin iyununda – Avstriya toplanışının elə ilk günündə müqavilə imzalayıb. Onda müqaviləsi 3 illik idi, ancaq “Qarabağ” ötən il sentyabrın 24-də müqavilə müddətini daha iki il artırdı, bu isə o deməkdi ki, qeyri-adi təklif olmasa, Yankoviç 2027-ci il iyunun 30-na qədər “Qarabağ”da olacaq.

Monteneqro yığmasının da aparıcı oyunçularındandı, 2016-cı il mayın 29-da debüt etdiyi milli komandada indiyə qədər 50 oyun keçirib, 1 qol vurub. Serbiya çempionu və kubokunun sahibi, Azərbaycan çempionu və Sloveniya kubokunun sahibidi.

KAMAL SƏFƏR