“Zirə”nin uğursuzluğu yalnız iki hakimlə bağlıdı? - ŞOK ARAŞDIRMA
Cari mövsümə uğurlu başlayan “Zirə” artıq 10 oyundu qələbəyə həsrətdi.
“Qartallar”ın çalışdırıcısı Rəşad Sadıqov hakim idarəçiliyindən kəskin narazılığı ilə seçilən baş məşqçidi. Elə sonuncu dəfə “Neftçi” ilə oyundan sonrakı mətbuat konfransında da diqqətçəkən sözləriylə gündəmə gəldi. 41 yaşı mütəxəssisin həmin fikirləriylə sizi tanış edirik:
“Əsas sualım odu ki, bu qol bizim qapıya vurulsaydı, VAR-dakı Rəşad Əhmədov əsas hakimi çağıracaqdı, ya yox? Başqa sualım yoxdu. "Sabah"la matçda Rəşad Əhmədov, "Səbail"lə görüşdə Rəşad Əhmədov, bu gün Rəşad Əhmədov. 9 oyundan 6-da Rəşad Əhmədov bizim oyunda idi. Ya VAR-da, ya AVAR-da, ya da baş hakim olub. Rauf Cabbarov gedir, Rəşad Əhmədov gəlir, ya da əksinə. Bu ikisindən heç cür qurtula bilmirəm də”.
Matçın gərginliyini nəzərə alsaq, onun sözlərindəki hiss-həyəcan anlaşılandı. Lakin Sadıqovun konkret bu iki hakimin adını hallandırması maraq doğurdu. Qısa bir araşdırma apardıq: görəsən, baş məşqçi dediklərində haqlıdımı?
Ümumiyyətlə, Rauf Cabbarovla Rəşad Əhmədov “Zirə”nin 9 çempionat oyununda ya baş hakim, ya da VAR hakimi kimi yer alıb. Bu 9 matçda 2 qələbə, 3 heç-heçə və 4 məğlubiyyət qeydə alınıb. Alınan nəticəni hesablasaq, 9 oyuna 9 xal qazana biliblər. Komandanın hesabında 23 turdan sonra 32 xal var. Mümkün xalların yarısından da azdı. Sual yaranır ki, bəs bu hakimlərin olmadığı görüşlərdə itirilən xallar kimin və nəyin hesabınadı? Bütün bu məğlubiyyətlərdən yaxanı kənara çəkməyə xidmət edən bu sözlər nəyə lazımdı? Son 10 oyunda qələbəyə həsrət qalan komanda rəqib qapılarına cəmi bircə dəfə yol tapa bilib. Ümumilikdə isə 23 turda, sadəcə, 14 qol vurublar. Bu, premyer-liqadakı ən aşağı göstəricidi. Hesabında 15 xal olan, sonuncu pillədə yer alan “Qəbələ” belə qol sayında qəsəbə təmsilçisindən irəlidədi. İndi bunu necə başa düşək? Rəşad Sadıqov müdafiə futbolu oynatmadığını desə də, nəticələr bizə bunu göstərmir. Hücum xəttindən narazılıq edir, amma o hücumçuları komandaya kim gətirib ki? Adətən, seleksiya bölməsinin seçdiyi futbolçuların taleyinə baş məşqçinin fikrindən sonra aydınlıq gəlir. Bəlkə də “Zirə”də sistem fərqlidi... Anlaşılan odu ki, belə oyun üslubuyla “qartallar” nəinki avrokuboklara yollana, heç mövsümü yuxarı yerlərdə başa vura da bilməyəcək.
KAMAL SƏFƏR
