"Düşünürəm ki, "Qarabağ"ın mərhələ adlamasına arxayınlaşmaq, oyuna tam məsuliyyətlə hazırlaşmamaq və diqqətli olmamaq mane ola bilər. Lakin bu da "Qarabağ"ın təcrübəsində rast gəlinməyən haldı. Qurban Qurbanovun ən üstün cəhətlərindən biri həmişə komandanı rəqiblərə ciddi yanaşmaq mənasında tonusda saxlamaqdı. Digər tərəfdən, bu məsələdə hamılıqla dəstək olmalıyıq. Çünki bəzi mətbuat orqanları və mütəxəssislər hər şey ilk oyunda həll olunub kimi fikirlər irəli sürür. Bu da komanda üçün çox təhlükəlidi. Təbii ki, "Braqa" da ilk oyundan sonra matça ciddi yanaşacaq. Braqadakı oyuna getmişdim. Hətta dünən bu komandanın çempionat oyununu da izlədim. Orda olarkən hiss etdim ki, azarkeşlər, klub işçiləri, ümumiyyətlə, hər kəs "Qarabağ" haqda çox ciddi düşünür. Bəlkə də ilk oyunda bu qədər ciddi yanaşmamışdılar. Lakin indi hər şey tam fərqlidi. Çempionat oyunu olsa belə, hər kəs Avropa Liqası, Bakı səfəri haqda düşünür. Mən hətta deyərdim onlar çempionatda xal itirməyə belə hazır idilər ki, komanda "Qarabağ" səfərində uğurlu nəticə qazansın. Təbii ki, hər birimiz "Qarabağ"ın qələbə qazanmasını ürəkdən istəyirik. Bu bizim üçün çox böyük, möhtəşəm uğurdu. Amma bir məqamı da yaddan çıxarmayaq: "Qarabağ" səfərdə iki top fərqi ilə qalib gəlibsə, "Braqa"nın da səfərdə qələbə qazanmaq şansı var. Ciddi olmalıyıq ki, uğur qazanaq. Danışılanlar və yazılanlar nə qədər mətbuatı oxumasalar belə, oyunçulara da gedib çatır. Ona görə də hamılıqla diqqətli olub, istədiyimiz nəticəni qazanmalıyıq. Bu qələbə "Qarabağ"ın timsalında bütün Azərbaycanın uğuru olacaq".