"İmişli" "Neftçi" qəbul edir - YENİLƏNİR

Bu gün Misli premyer-liqasında növbəti – 5-ci tur start götürəcək. Dörd gün ərzində keçiriləcək qarşılaşmalar “CBC Sport”un efirində canlı yayınlanacaq.

Qeyd edək ki, ilk 4 turda tətbiq olunan süni işıqlandırma sistemi olmayan stadionlarda oyun keçirilməsi qadağası 5-ci turdan etibarən başa çatdığına görə “İmişli”nin Yevlax şəhər stadionundan, “Araz-Naxçıvan”nın isə Şamaxı şəhər stadionundan istifadə etməsinə icazə verilib.

Misli premyer-liqası
1-ci dövrə, 5-ci tur
11 sentyabr
İmişli – Neftçi
“İmişli”nin bu rəqiblə ev oyununun balansı: 1:+0=1-0, 0:0.
2025/26 – 0:0.
Cəzalı: yoxdu.
“Futbol+”in proqnozu: 20-30-50.
Yevlax, şəhər stadionu. Saat 16.30.

“İmişli” yeni mövsümə pis başlamayıb. Hədəfi premyer-liqada qalmaq olan Aran təmsilçisi artıq ortabablar sırasında qərarlaşa bilib. Ancaq hələ gələcək haqda nikbin danışmaq üçün çox tezdi. “Pələnglər” sürəti bir qədər də artırmalı, mövqeyini möhkəmləndirmək uğrunda mübarizəni davam etdirməlidi. “Neftçi” isə zirvədədi. Düzdü, bakılıların ən yaxın izləyiciləri olan “Sabah” və “Qarabağ”ın hələ ehtiyatda bir oyunu var. Amma “ağ-qaralar” belə məqamlarda ilişə bilməz. Kollektiv hər matçda maksimum nəticə üçün tər tökməlidi ki, çempionluq hədəfindən yayınmasın.
Komandalar indiyə qədər 3 dəfə qarşılaşıb. Bunların 1-də “İmişli”, 1-də “Neftçi” qələbə qazanıb, 1-də qalib müəyyənləşməyib. Topların nisbətində “ağ-qaralar” öndədi – 8:3.

12 sentyabr
Kəpəz – Qəbələ
“Kəpəz”in bu rəqiblə ev oyunlarının balansı: 16:+6=4-6, 16:20.
2010/11 – 0:0, 0:0; 2011/12 – 3:2; 2012/13 – 1:0; 2015/16 – 3:0, 0:1; 2016/17 – 1:1, 2:0; 2017/18 – 1:6, 0:1; 2022/23 – 0:3, 2:2; 2023/24 – 0:1, 2:1; 2025/26 – 1:0, 0:2.
Cəzalı: yoxdu.
“Futbol+”in proqnozu: 30-30-40.
Gəncə, şəhər stadionu. Saat 17.30.

Göründüyü kimi, ikinci oyun günü bölgə təmsilçilərinin dueli ilə əlamətdar olacaq. Növbəti dəfə minlərlə azarkeşi önündə bəxtini sınamağa hazırlaşan “Kəpəz” xal ehtiyatını artırmağa çalışacaq. Ötən həftə “Şamaxı”nın darmadağın etdiyi komanda bu dəfə sərfəli nəticə qazanmağa məcburdu ki, günahını yuya bilsin. İş ondadı ki, klubun mətbuat xidmətinin dünən açıqladığı məlumata görə, oyun üçün cəmi 3500 bilet satılıb. Azarkeşlər bilet almaq üçün son günü gözləyib, yoxsa artıq son darmadağın kollektivə inamı qırıb? Bu sualın cavabını sabah tapacağıq. Bu gün o bəllidi ki, Kaxaber Sxadadzenin gedişindən sonra ilk qələbəsini qazanan “qırmızı-qaralar” Gəncəyə azı bir xal qazanmaq məqsədi ilə gələcək. Gəncəli azarkeşləri narahat edən əsas məqam Dieqo Verdaşka ilə bağlıdı. İş ondadı ki, kapitan srağagünkü məşqdə zədələnib. 29 yaşlı müdafiəçi artıq tibbi müayinədən keçib. Müayinə zamanı onun sağ bud əzələsində 14 santimetr uzunluğunda yırtıq aşkarlanıb. Portuqaliyalının müalicəsi təxminən 6 həftə davam edəcək.

Komandalar indiyə qədər 31 dəfə üz-üzə gəlib. Bunların 10-da “Kəpəz”, 13-də “Qəbələ” üç xala yiyələnib, 8-də “sülh” qeydə alınıb. Topların nisbətində “qırmızı-qaralar” öndədi – 39:28.

Sumqayıt – Şamaxı
“Sumqayıt”ın bu rəqiblə ev oyunlarının balansı: 26:+7=9-10, 28:33.
2011/12 – 0:2; 2012/13 – 0:0; 2013/14 – 0:2, 0:1; 2014/15 – 0:0, 3:1; 2015/16 – 1:1, 0:1; 2016/17 – 1:2, 2:2; 2017/18 – 3:1, 2:1; 2018/19 – 1:4, 2:1; 2019/20 – 0:0, 2:2; 2020/21 – 0:1, 2:2; 2021/22 – 1:3, 2:0; 2022/23 – 1:1, 1:0; 2024/25 – 2:1, 1:2; 2025/26 – 1:1, 0:1.
Cəzalı: Səbuhi Abdullazadə (Sumqayıt).
"Futbol+"in proqnozu: 30-30-40.
Sumqayıt, “SOCAR Polymer Arena”. Saat 19.45.

Bəli, “Sumqayıt” bəhs edəcəyimiz ev oyununu da “Mehdi Hüseynzadə”də keçirməyəcək. Əlində klubdan qəzetimizə verilən məlumata görə, idman qurğusunun ot örtüyü tam hazırdı. Sadəcə, müəyyən risklər var ki, qazonun yenidən sıradan çıxmasına səbəb ola bilər. Odu ki, “kimyaçılar” belə təhlükə ilə üzləşmək istəmirlər. İstənilən halda, komanda hələ mövsümdə ilk qələbəsini qazanmadığından daha vacib məsələlərə köklənmək lazımdı. Öz aramızdı, azarkeşlər baş məşqçi Filipe Kandidoya, futbolçulara güvəndiklərini deyirlər. Onlar, nəhayət, bu həftə etimadı doğrultmalıdı. Çünki turlar geridə qaldıqca “gənclik şəhəri”nin təmsilçisi üçün ümidverici danışmaq çətinləşir. “Şamaxı”da isə vəziyyət fərqlidi. Ağzına qədər dolu Gəncə stadionunda “Kəpəz”i darmadağın edən “şirlər” özünü yaxşı tərəfdən göstərməyə can atır və istəyini həm də nəticələrə “köçürür”.
Bu komandalar indiyə qədər 50 dəfə qarşılaşıb. Bunların 14-də “Sumqayıt”, 22-də “Şamaxı” qələbə qazanıb, 14-də qalib müəyyənləşməyib. Topların nisbətində “şirlər” öndədi – 68:51.

13 sentyabr
Araz-Naxçıvan – Turan Tovuz
“Araz-Naxçıvan”ın bu rəqiblə ev oyunlarının balansı: 6:+1=2-3, 3:9.
2023/24 – 0:3, 0:1; 2024/25 – 1:0, 1:1; 2025/26 – 1:1, 0:3.
Cəzalı: yoxdu.
“Futbol+”in proqnozu: 30-30-40.
Şamaxı, şəhər stadionu. Saat 16.30.

“Neftçi”nin meydanında darmadağın olandan sonra “Sabah” və “Qarabağ” ilə qarşılaşan “Araz-Naxçıvan” daha yaxşı təsir bağışladı. Düzdü, cəsarətli oyun komandaya qələbə gətirmədi. Ancaq iddialı, güclü rəqiblərə qarı sərgilənən performans növbəti matçlar üçün ümid verdi. Bəxtsizlikdən “qırmızı-ağlar”ın növbəti rəqibi də çempionluq uğrunda mübarizə aparır. O başqa məsələ ki, avrokuboklara yollanmaq arzusunda olan naxçıvanlılar məhz belə komandalarla mübarizə şəraitində özünü ən yaxşı tərəfdən göstərməyə məcburdu. “Turan Tovuz”un durumu isə qənaətbəxşdi. Bəli, “bozqurd” çempionluq iddiasına uyğun çıxış etməkdə çətinlik çəkir. Ancaq hələ çox şey itirilməyib. Məqsədyönümlü dəyişikliklər bölgə təmsilçisi üçün parlaq gələcək vəd edə bilər...

Bu komandalar indiyə qədər 11 dəfə üz-üzə gəlib. Bunların 3-də “Araz-Naxçıvan”, 6-da “Turan Tovuz” qələbəyə sevinib, 2-də heç-heçə qeydə alınıb. Topların nisbətində “bozqurd” öndədi – 17:8.

Zirə – Qarabağ
“Zirə”nin bu rəqiblə ev oyunlarının balansı: 22:+1=5-16, 12:52.
2015/16 – 0:0, 0:2; 2016/17 – 0:2, 0:0; 2017/18 – 2:3, 1:2; 2018/19 – 0:6, 0:3; 2019/20 – 1:3, 0:6; 2020/21 – 0:0, 0:2; 2021/22 – 1:1, 0:3; 2022/23 – 1:7, 0:1; 2023/24 – 0:1, 0:1; 2024/25 – 1:3, 3:2; 2025/26 – 1:1, 1:3.
Cəzalı: Kadi Borges (Qarabağ).
“Futbol+”in proqnozu: 30-30-40.
Zirə, İdman Kompleksinin stadionu. Saat 19.00.

Yeni “futbol ili”nə fırtına kimi başlayan, ilk üç oyunun hamısında qalib gələn “Zirə” “Sabah”ın meydanında biabırçı hesabla uduzdu. Masazırda 5 cavabsız qol buraxan komandanın hansı psixoloji vəziyyətdə olduğunu bilmirik. Lakin növbəti rəqibin “Qarabağ” olması “qartallar”ı ən qısa zamanda toparlanmağa vadar etməlidi. İş ondadı ki, “Araz-Naxçıvan”ı çətinliklə məğlub edən “köhlən atlar”da da daşlar hələ tam yerinə oturmayıb. Bu üzdən Zirədə keçirəcək qarşılaşmanı, iki iddialı kollektivin, güclü, yerli mütəxəssislərin – Rəşad Sadıqovla Qurban Qurbanovun duelini izləməyə dəyər.
Bu komandalar indiyə qədər 42 dəfə qarşılaşıb. Bunların 2-də “Zirə”, 27-də “Qarabağ” qalib gəlib, 13-ü “sülh”lə başa çatıb. Topların nisbətində “köhlən atlar” öndədi – 85:24.

14 sentyabr
Şəfa – Sabah
“Şəfa” bu rəqiblə evdə ilk dəfə qarşılaşacaq.
Cəzalı: yoxdu.
“Futbol+”in proqnozu: 20-30-50.
Sumqayıt, “SOCAR Polymer Arena”. Saat 19.00.

“Şəfa” debutant olsa da, “Sumqayıt”la “Araz-Naxçıvan”dan fərqli ilk qələbəsini qazana bilib. İndi xal ehtiyatını bir qədər də artırmağın vaxtıdı. Bəli, komandanı Mançesterdən yorğun qayıdan “Sabah” gözləyir. Ancaq bu məqama bel bağlamaq sadəlövhlük olar. Azı ona görə ki, “bayquşlar” yetərincə geniş heyətə malikdi. Hər halda, şanslar qonaqların tərəfindədi. Meydan sahibləri isə boyundan bir qədər yuxarı tullanmalı, rəqibin cari durumundan maksimum yararlanmalıdı.

Bu komandaların duelləri ilə bağlı maraqlı məqamlar
// Son iki oyunda 5 və ya daha çox qol vurulub. “İmişli”nin ev görüşü qolsuz başa çatıb.
// Son 4 matçda qol vuran komanda qalib gəlib. “Kəpəz”in son iki ev qarşılaşmasında 2-dən çox qol olmayıb.
// “Şamaxı” son 7 oyunda qol vurub. Son 4 matçda meydan sahibi olan komanda qələbə qazanmayıb.
// “Turan Tovuz” son 5 oyunda qol vurub. “Araz-Naxçıvan” son 3 ev matçında qalib gəlməyib.
// “Qarabağ” son 10 qarşılaşmada rəqib qapısına yol tapıb. “Zirə”nin son 4 ev görüşündə hər iki komanda fərqlənib.

KƏNAN BAHADIR