Türkiyə superkubokunun taleyi ilə bağlı ortaya yeni iddialar atılıb.

Bilindiyi kimi, əzəli rəqiblər “Qalatasaray”la “Fənərbaxça”nın duelinə səhnə olacağı gözlənilən superkubok qarşılaşması dekabrın 29-da Səudiyyə Ərəbistanının paytaxtı Ər-Riyadda keçirilməliydi. Amma ərəblərin bu matçda Türkiyə cümhuriyyətinin qurucusu Mustafa Kamal Atatürkə aid pankartın açılmasına və köynəklərin geyinilməsinə icazə verməməsi qalmaqala səbəb olmuşdu. Hər iki komanda buna etiraz əlaməti kimi meydana çıxmaqdan imtina etmiş və Türkiyə Futbol Federasiyası böyük maraqla gözlənilən oyunun təxirə salındığını açıqlamışdı. Türkiyə mətbuatının yazdığına inansaq, federasiya superkubokun yeni tarixi üzərində durmadan baş sındırır. Hətta buna görə superliqada mövsümün bir həftə geri çəkiləcəyi də deyilir.

“343 Digital” adlı “yutub” kanalının iddiasına görə superkubok fevralın 15-dən öncə baş tutacaq. Yəni qarşıdakı bir ayda həftəsonuna təsadüf edəcək turlardan biri təxirə salınacaq və həmin vaxt superkubok uğrunda görüş keçiriləcək. Həmin tarixdən sonra bütün turlar bir həftə irəli çəkiləcək. Bu üzdən mövsüm mayın 17-19-da yox, uyğun olaraq 24-26-da başa çatacaq. Qəribədi ki, superkuboka evsahibliyi edə biləcək stadionlar arasında yenə “Atatürk Olimpiya”nın adı çəkilmir. Halbuki həm “Qalatasaray”, həm də “Fənərbaxça” rəsmiləri daha öncə bir neçə dəfə matçın məhz bu arenada keçirilməsinin tərəfdarı olduqlarını açıqlamışdılar. Amma digər tərəfdən 80 minlik nəhəng arenaya hər iki klubun azarkeşləri buraxılsa, təhlükəsizlik baxımından bəzi problemlər yaşana bilər. Çox güman, TFF məhz bu üzdən “Atatürk Olimpiya”nı namizəd stadionların siyahısından çıxarıb. Hələ ki superkuboka ev sahibliyi etməyə iki şəhər – Samsun və Ankara əsas namizəd göstərilir.

Digər bir iddiaya görə, Səudiyyə Ərəbistanında yaşanan son qalmaqalın ardından nüfuzuna ciddi zərbə dəyən TFF prezidenti Mehmet Büyükekşi tezliklə istefa verərək növbədənkənar seçki təyin edəcək. Jurnalist İsmayıl Erin xəbərinə görə, Büyükekşini əvəzləməyə əsas namizəd Cəmil Kazancı sayılır. Əslən rizəli olan 62 yaşlı Kazancı iş adamıdı və heç vaxt futbol sahəsində çalışmayıb. O, “Kazancı Holdinq” və “Aksa Enerji” şirkətlərinin idarə heyətinin sədridi.