Gürcüstanın paytaxtı Tbilisidə keçirilən “Tbilisi Cup” beynəlxalaq turnirinə yekun vurulub. “Sabah”ın U-11 komandasının da turnirə qatıldığını xəbər vermişdik. Finalda yerli “Lokomotiv”lə qarşılaşan Arslan Quliyevin yetirmələri qolsuz bitən oyunun penalti seriyasında məğlub olaraq (2:3) 2-ci yeri tutub.

“Footbal-plus.az” Arslan Quliyevin turnirlə bağlı fikirlərini öyrəndi:

“Finalda Tbilisinin “Lokomotiv” komandasına qarşı oynadıq. Rəqib çox güclü idi, meydanda gərgin mübarizə getdi. Oyun baxımından bizdən daha təcrübəliydilər. Biz ölkə çempionatında “6+1” (6 oyunçu və qapıçı – red.) formatında oynayırıq. Onlar artıq ilyarımdı “8+1” formatında oynayırlar. Ümumiyyətlə, turnirə qatılan bütün komandalar uzun müddətdi bu formatda oynayır. Ona görə də bu mənada bir qədər çətinlik çəkdik. Buna baxmayaraq, uşaqlar mübarizə apardı. Oyunda bizim də, rəqibin də qol imkanları oldu. Penalti seriyasında qalib gələ bilmədik. Uşaqlar həyəcan, səfərdə oynamaq, azarkeş dəstəyi amilinə görə psixoloji cəhətdən bir qədər gərgin idilər. Çox yaxşı turnir oldu, rəqiblər hamısı güclüydü. Bütün oyunlar çox çətin mübarizə şəraitində keçdi. Uşaqlar nə qədər belə turnirlərdə iştirak etsələr, təcrübələri artacaq. Gələcəkdə də belə turnirlərdə iştirak edəcəyik”.

ƏSƏD SEYİDOV